Aizawl : Kum 6 mi tel in Minung 5 That tu Thu ṭhen sak a si ding

Minung 5 that ruangah thuṭhenzung lam in thiamlo coter zo, Lal Tlan Chhuaha (kum 42) cu November ni 5 ah Addl. District & Sessions Court ah suah pi a si ih a hrem dan ding thu an rel sak a si.

Cozah ukil le mithi tei` ukil cun Thih Daantat dingin hremnak pek an beisei nan sual tuahtu` ukil cun damsung thawng tlak nak thawn hremdan ṭhum deuh dingin thuṭhentu hnen ah a ngen.

Mithattu Lal Tlan Chhuaha khalin thilsual a tuah mi par ah a siraw thu le poi a ti zet thu a rel suak ih That Daantat lo dingin thuṭhentu hnen ah a ngen ve.

Thuṭhen zung ah caan tawk mawi an um hnu ah Thuṭhentu Dr. HTC Lal Rin Chhana cun November 9, Kum 2020 zinglam nazi 11 ah mithattu Lal Tlan Chhuaha Daantatnak an nei ding thu a phuang.

Lal Tlan Chhuaha in Pu Siama te` Inn a luhcilh

Aizawl : Kum 2015 ih tualthatnak rapthlak a thleng mi a siih hih thuthang hin Mizoram a hnin ter.

Mithattu Lal Tlan Chhuaha le a that mi Pu Sang Lian Siama (kum 57) hi hnaṭuan tlang an siih Pu Siama hin Fridge sia a rem nak ah a hruai ṭheu.

Pu Siama te inn ah minung 7 an um ih vansiat an tong ding zaan cu minung 5 lawng an rak um.

Zaan thim hnu ah Lal Tlan Chhuaha cun Pu Siama te paisa dil dingin a va pan hai ih Rs. 1000 an rak pe.

An pek mi duhtawk lo in a dil bet hai ih tiaw thiam lo in an ṭongkam a sang vivo. Culai ah Lal Tlan Chhuaha cun naamtong a cuh lohli ih Pu Siama cu a dawt that.

Cuhnu ah innsung ih um inteknu Khual Thangi (kum 57), fapa an cawm mi Isaac Lal Rin Nunga (kum 6), intekpai` naunu Van Lal Chhungi (kum 54) le an inn ihsi tlawngkai Samuel Lal Rin Chhana (kum 14) pawl cu a sangsang ten a that thluh hai.

Kiangkap venghnen pawl in an thawmvang an thei nan innsung lam in tawh an hren ruangah run dingin zohman an lut thei lo.

Mibur cun innleng lam in an hro ciamco ih an thawmvang a ring vivo ruangah mithattu cun ṭih in tukvirh lam in a dawp suak.

Ziin sak, mi innsung ah a relh ih mipi in nazet ih kut an thlak man hlan ah Palik an thleng man ih a himdam fangfang. Cutin palik in an kai ih mipi pawl ih kut thlak thei lo dingin an hum hnu ah thawng an thlak a si.

Hih thuthang hin Mizoram a khawng na tuk ih tu ni tiang lungawi thei hrih lo an tam zet. “Christian ram kan si ih ngaithiam nun nei ding’ titu an um ih minung 5 nunnak rori a lak ruangah a mah nunnak khal lak ve a ṭul titu khal an um.

Tudinhmun ahcun mipi in ziangtluk in au hman khal seh la Court lam ih thlen pi zo a si tikah ti thei mi ziang hman a um lo ih sual a tuah mi par ih Daantat ding cu Judge kut sung ah a um a si.

Leave a Reply

Your email address will not be published. Required fields are marked *