Aizawl, Kulikawn ih Naam thawn Dawt thatawknak thuhla cipciar

Aizawl, Kulikawn veng ih naam thawn dawt thatawknak cun Mizoram pumpi a ti hnin. Zohman ih ruat banlo vanduainak rapthlak cu innsungsang pakhat tlun ah a thleng.

Vanduainak tongtu cu Dr. Lalṭanpuia a siih naamdawtnak hliamhma thawn thi le hnai lak ah nungdawk thidawk in an hmu.

Amah hi Aizawl Siizungpi ih Siibawi a siih a nupi Mary le fanau pathum thawn Aizawl, Kulikawn veng ah an um.

December 9 zaan khawthimhnu ah Dr. Lalṭanpuia tei` innsung ihsin nauhak ṭap awn a suak cu Veng hnen pawl nih an va pam lohli ih Dr. Lalṭanpuia cu thi le hnai thawn itkhun ke kiang ah an hmu. A vorhlam Awm ah naamte dawtnak hliamhma a um.

“Zaan nazi 7 hnu hrawng ah Lalṭanpuia umdan a diklo zamrangten ra aw ti`n mipakhat in, in ko cu ka thinphang tukih kawr khal hruh man loin inntang ah ka suk” tiah Dr. Lalṭanpuia ih cousin Zomuana in a sim.

Amah hi Dr. Lalṭanpuia tei` inntlun ih um a siih palik thleng hlan ah naamdawttuar Lalṭanpuia hmuhmaisalam a si ve.

Amah cun “an inn luhnakding karbak ah a fanu cu mi in an rak cawi ih ‘Ka nu cu kan Inn ih um ding ka duh nawn lo’ ti`n a ṭapṭong awn ka thei. Ziangkhal ruatman nawnloin mibur hai phah in innsung ka lut cu thi le hnai thawn itkhun kiang ah bawkhmun ih rak um Lalṭanpuia cu ka va hmu.”

“A thi ṭhenkhat cu a rak khang zo ih a kiang ah a fapa te a to. Nauhak a si thawn a pa thisen a hmu kha ka zangfah deuh ih keimah in ka rak buaipi ding ka ti ih room khatlam ah ka va ret.”

Dr. Lalṭanpuia le a cousin Zomuana cu Putu an si nan unau rualṭha vek rorin zohawtonmi an si ih an kohawk khalah duhkoh in Lan ti`n le Zon tiih ko aw ṭheu an si.

Zomuana cun “a thaw khal a thaw nawnlo. A mit khal a let thluh. Thi le hnai thawn a um ruangah thlalang atnak hliamhma tivek ruangah teh si pei maw ti`n a taksa ka zoh kual nan taksa pem dang ka hmu lo. Cuhnu ah a Awm ka nam ih voihnihnak tiang cu ziangtinhman a um lo. Voithumnak ka nam lawng ah ‘hawww` tin a thaw a thaw sal ih ‘Lan in thei maw’ ti`n ka sut cu ‘thei ee, ka Awm ihsin thi suaklo dingin nam ṭha aw’ in ti” tiah a sim.

“Zo in saw a lo hliam, innsung ah a um lai maw in sim aw” ti`n ka sut nan “Ka Awm ih thi suak kha phit tum sawn aw” in ti. A Awn ka nam ruangih thaw thaw thei fang a si ruangah ka biak rero lo cun in cat san ding ka phang ruangah ka biak rero. Caantawkmawi rei hnu ah annsuai sung ih pawa a dawh ih himi thawn ka awm thisuak kha phit aw’ in ti”

“Ka nu le veng upa ṭhenkhat an ra thleng ih Lan tuahmawhtu innsung ih a um lai pangah ti`n Lan awm cu midang ka nem ter ih innsung room tinkim ka bih kual.”

“Zohman ka hmu lo ih ek-inn ka va zoh cu a sunglam in a rak kalhaw. Asung ah Ṭanpuia nupi Mary a rak um. Sangka in ong aw ka tiih in ong duhlo ruangah sangka ka sit bal. Mary cu a bawngbi khuk tiang phoih in a rak to ih a zohnak kel zoh ringring in kuat fawp phah in a rak to.”

“Ka biak nan ziang khal in sawn lo. A umdan ka zoh ih mah Pasal rori thi le hnai thawn um lai ah ngaihsaklo tukih a um cu thinheng in sangka ka sit sal nan a cangvai cuanglo. A biang ih kutzungthum thi neh thawn Kuak zuuk phah in a zoh nak bang cu a zoh ringring thotho. Thinheng tuar lo ah Ek-inn sangka cu ka sit bal ṭheh lawlaw ih a sam in hrui in thi le hnai lak ih caurau a pasal zohter dingin ka dir suak tumnan napin kut ka thlak ding an phang ruangah kaingkap um pawl in inkham.”

“Ka sungkhat le veng upa lam in inkham nasatuk ruangah cangvai loin ka um. Caantawkmawi rei hnu ah Ṭanpuia cu blanket thawn an rak zawn suak ih ka va pan hnu ah ‘Lan na ṭha ko maw’ tiah ka sut. ‘Doctor a si vekin thitamtuk a suak cun a dinhmun a besia vivo ding timi a thei ruangah ‘ka Awm kha in nam sak aw’ in ti lala.”

Cutin, Dr. Lalṭanpuia cu Aizawl siizungpi lam ah an tlanpi ih Siizung an thleng ahcun a ṭong ṭhiṭha thei nawn lo.

“Motor ihsin mina zawn nak ih ka ṭhum tum ah ka biak nan a lu lawng a sut. Thisen tamtuk a suak ruangah a caurau rori si ko. Mina zawnnak ka ret hnu ah a sam vek a remaw phahphah in ka hmu” ti`n Zomuana cun a sim.

Dr. Lalṭanpuia cu a hnaṭuanpi a rualṭha pawl in an thiam pittawp suah in an enkol nan a nat tuar loin zaan nazi 10 hrawng ah a nunnak a cem.

Zomuana cun “naam dawt a tuar nak cu mehtawk hrek tiat hrawng hliamhma a um. Naamte khan minung taksa peng tinkim hrang thi pamtu a Lung a sawh tlang ih a cuap khal a dai ban. Curuangah dam thei dinhmun a si lo ih mual a liam a si” a ti.

Zo in naam thawn a dawt?
Naamte dawttu hi theih ciang a si hrih lo. An dinhmun, an innsung boruak umdan ahcun a nupi Mary ih dawt that mi a si thei tiah a hmutu pawl cun an sim.

Miṭhenkhat ih reldan ahcun Mary hi Sii vai hmang a si tiah an sim ih an innsungsang thuhla thei ciang pawl khalin thil pakhatkhat eddict neimi a bang tiah an sim.

Mithi tei` sungkhat le innsangnu tei` sungkhat lam in Mary cu ziangvek mizia nei a si timi an relsuaklo ih an buaizaan thuhla cu Dr. Lalṭanpuia ih nute in a hmuhtonmi le an innsung ih thilcang mallai a sim.

Amah cun “Ek-inn ih to ringring Mary cu kiangkap naivai pawl in “ziangruangah hitin na tuah” an tiih ‘hihnah hmun hi relfiangawknak ding hmun a si lo. Relnakding hmun ah ka ṭongsuak leh ding tiah Mary in a sawn. Palik an thleng hnu ah Dr. Lalṭanpuia dawtnak naamte umnak an sut tikah a mah rorin a vung lak ih palik kut ah a pek.”

“Palik pawl in plastic sungah naamte an ret ṭha tum cu ‘plastic sungah san a ṭullo cahnah thawn tuam men uh’ tiah Mary in a ti. Palikzung ah an hrui ih thusutnak an nei khal ah ṭhaten a ṭong duhlo an ti. Nan, ‘thilzuar duh le duhlo thu ah mallai eltonawknak nei vekin a rel an ti” tiah a sim.

Palik lam in thuhla umdan cu mallai an thei zo nan zingzoinak nei rero lai a si ruangah thuthang zianghman an phuang hrih lo ih, tu ah Dr. Lalṭanpuia thattu siding rinhlehum Mary cu palik kut sungah a um hrih tiah ZTA media in a tarlang a si.

Leave a Reply

Your email address will not be published. Required fields are marked *