AIIMS siizung dot 4 nakin Journalist hnaṭuan Dawp That, A thihdan rinhleh um deuh

Delhi : COVID-19 nathrik kaai, health journalist Tarun Sisodiya (kum 37) cu an tuamhlawmnak AIIMS siizung innchaung dot 4 nak in a dawp that. Amah hi Delhi, Bhajanpura ih ummi a siih Hindi daily thuthang zung ih hnaṭuan a si.

Thluak lam damlonak in Delhi, GB Pant siizung ih operation a neih hnu, June 24 ah Covid – 19 nathrik a taksa ih humhsuak a si ruangah AIIMS siizung ih retmi a siih, damlam a pan vivo nan, tuah, AIIMS siizung dot 4 nak ihsin a dawp that a si.

Journalist Tarun Sisodiya (kum 37)

AIIMS siizung ih ṭuanvonei pakhat cun, “Thluak lam damlonak in GB Pant siizung ah operation an tuah. Cuhnu ah, Covid 19 test nak an nei ih a positive ruangah AIIMS siizung ah zohkhen a si. Ṭhatlam a pan vivo ruangah oxygen peknak hmun ihsin ṭhatlam pan vivo pawl retnak hmun ah kan ṭhawn tum lai fangah hivek in thil a cang a si.”

Leitlun siizung hminthang pawl lak ih telban vemi AIIMS

“Sizung hnaṭuan pawl in an kham rero nan a umnak innchaung dot 1 nak ihsin dot 4 nak ah a tlan ih tukvirh sangkate a siat ih a dawp. Ṭuanvo neitu pawl in emergency ICU lam ah an tlan pi nan a nat celh loin a thi a si” tiin a sim.

Journalist a si ruangah a thih thu cu a thang zetih a thih naksan khal a phunphun in an rel. A thuhla titiinak WhatApp group tiang in an tuah ih miṭhenkhat cun thuthup theimi a nei ruangah that mi a si titiang in an sim. A hnaṭuanpi le Journalist ṭhenkhat in a thuhla zingzoi ciang dingin palik hnen ah heknak an nei ti khalin thu a um a ih a thuhla zingzoi ciangnak nei dingin awnailo duhphorhnak neitu khal an um a si.

Tuah, Delhi khau sung ah offcial in Covid 19 nat kaaitu mipum 100000 luan an um zo. Cupawl lak ihsin mipum 72088 an dam saalih mipum 3115 an thi a si.

ref:TOI,ANI

Leave a Reply

Your email address will not be published. Required fields are marked *