Afghanistan : Taliban ralhraang dotu ralkapbu in ramkulh 3 an la thei saal

Afghanistan Public’s Resistance Forces cun ralhraang Taliban kutsung ihsin district 3 kan la saal thei zo tiah August 20, tlawngkai ninga ah an phuang.

Afghan mipi humtu ralkapbu cun Pol-e-Hesar, Deh Salah le Banu districts pawl an la saal thei thu an phuang hlei ah doawknak ah Taliban ralhraang thi le hriam tuar 60 lenglo an um ih hmunram dang khal kan la bet vivo ding ti`n thu an suah.

Afghan news agency “Asvaka” tarlang mivek a si le Afghanistan vice-president hlun Amrulla Saleh in caretaker president dinhmun in Taliban ralhraang dotuding a hawl khawm rero lai ti a si.

Afghan Public’s Resistance Forces ih thu phuan cu acting minister of defence Bismillah Muhammadi (Minister hlun) khalin twitter ah a tarlang ih “Taliban ralhraang do ding cu kan ṭuanvo a si. Pul-e-Hesar, Deh Salah le Banu districts pawl cu mipi lam ṭang Resistance Forces kut sung ah a um zo. Dothlengnak a nung lai a si” a ti.

US cozah in a ram ralkap pawl a la kir saal thokin Taliban ralhraang pawl cun Afghan ram an uk tum ih a sangsang ten hmunram an la vivo.

Dinglai cozah kaihruaitu Afghan President in ram le mipi a tlansan hnu, August 15 ah ralhraang pawl cun Kabul khuapi an la suak.

Atu ah Afghan khuapi Kabul cu Taliban ralhraang kut sung ah a um nan do leet tuding mipi` ralkapbu thazaang a cak vivo cun lal cuh aw in an ram buainak a sosang vivo ding zum a um a si.

Leave a Reply

Your email address will not be published. Required fields are marked *