Kum 16 mi in A Nu le Pa thattu Taliban ralkap pathum a Kaap that

Afghan fala note in an tualhmai rori ih a nu le pa thattu Taliban ralhraang mi pathum cu a pai` meithal AK-47 thawn a kaap that.

Kandung zarh ih thilthleng a siih, Taliban ralkap 40 hrawng in an umnak central Ghor province, Geriveh khua an siim ih fala Qamar Gul (kum 16) ih pa hawl in zinglam nazi 1 hrawng ah an inn ah an luhkhum.

Fala Qamar Gul ih pa cu cozah hnaṭuan a siih Taliban ralkap pawl in Afghan cozah a bawm a si ti`n an puh ih kaai dingin an hawl mi a si.

An inn sung ah an luhkhum hnu ah Qamar Gul le a naupa (kum 12) hmuhhngan rori ah a nu le pa an that sak. Qamar Gul cu ningna thinheng supawthei loin a pai` AK-47 meithal a cuh ih Taliban ralhraang pawl cu a kaap ve hai.

Taliban ralkap pathum a kaap that ih khawsung mipi le cozah hnaṭuan pawl in an bawm bet ih nazi 1 sung an kaap aw. Khua mipi le cozah hnaṭuan in lungrual ṭih loin an do ruangah Taliban ralkap pawl cu an tlan hlo thluh.

Qamar Gul tei` sungkua cu an umnak khua ah unau sungkhat ṭhitha khal nei mi an si lo. Nan, tuahcun, Afghan cozah in an unau hnih in hmun himnak ah an ret zo.

Ghor province governor Mohamed Aref Aber cun, “an hmuhhnganpa rori ah an nu le pa an that sak ruangah an thin a phang tukih nihnih sung lai an ṭong ṭhiṭha thei lo. Nan, a nu le pa thattu hnen ah phuba an laak ngah ruangah an hna a ngam” tiin a sim.

An unau hnih ih ralṭhatnak cu Afghan cozahpi in upatnak a pek ih rampi President khalin a inn ah leng dingin a sawm hai a si.

ref:Dailymail,TheGuardian

Leave a Reply

Your email address will not be published. Required fields are marked *