A hlo nak Kum 35 rei zo mi Vanzam suaksaal cun Japan mipi Thinphangter

August 12, 1985 kum ah Osaka lam pan ding mi Japan Airline vanzam JL123 cu Tyoko Airport ihsin a poksuak ih a zam hnu minute 12 rei ah a mei siat ih Gunma Prefecture tlang par ah a tlak. Vanzam totu minung 520 thi in mi 4 lawng an dam.

Vanzam cangsualnak kum 35th kim nakding ni malte lawng duh ah cuih vanzam siatral zo mi number JL123 ciah cu vanzam track nak website (Flight Radar 24) ah a lang dukdi ih Japan mipi an thin phang thluh.

Cubetah August 13 in 16 karlak hi mithi khua ih thlarau pawl in sungkhat unau an veh tikcuu “Obon” puai a si ruangah Japan mipi pawl cu an thinphang luar.

Vanzam track nak website Flight Radar 24 rak zohhliahtu mi pakhat cun “ziangtin, Vanzam number JL123 cu a lang dukdi thiam” ti`n Twitter ah a ngan.

“Raapthlak um in, a duhduh nak hmun ah a kaat vivo ual JL123 cu” ti`n mipakhat in a ngan ve.

“ziangtin JL123 lamlam a suaksaal thiam. Tuhlan kum reipi ih tlaksiat zomikha si lo sawm”

“Obon season a si ual, an ra kirsaal tla si men thei lo ziang”

Hitin, mipi an thinphang thluh ruangah Japan Airline lam in simfiahnak an neiih, cuih ca ahcun, “thinphang ding um lo. a tui` nan hmu mi cu Japan Airlines flight JL712 sawn a si. Airline staff member pawl in technical test an nei nakah Vanzam number JL123 lang dingin an hril ngah pang mi a si.”

“Mipi thinphangter duh ih tuah hrim mi a si lo. Zamrang thei bikin kan company airplane number rules kan thleng lohli ding. In ngai thiam hram uh” ti`n mipi ngaithiam an dil.

Flight number JL123 cu vanzam track nak website Flight Radar 24 ah minute 30 sung hrawng a lang.

Airline official in simfiahnak a nei cing in, mi pakhat cun, “Flight JL123 accident nak kum 35 a kim zik thlang. Atui` kan hmu mi hi airline lam ih thil tisual siloin mithi 520 thlarau pawl in hngilh lo ding ih in sim theihnak Larawnak khal a si thei” a ti.

ref:Flightradar24

Leave a Reply

Your email address will not be published. Required fields are marked *