9/11 Thuthup phuang dingin US Federal Judge in Saudi Arabia Cozah thu a Sut

US federal Judge cun 9/11 buainak thawn pehpar in Saudi Arabia cozah hnen ah thuhla umdan sutciangnak a nei tiah 9/11 ṭum ih mithi sungkhat unau pawl bawmtu Lawyer James Kreindler in News 18 hnen ah a sim.

Misual pawl in Leitlun inn sangbik a rak si dah mi World Trade Center innpi cu 11 September 2001 ah Vanzam thawn an pahpuak ih minung 3000 kimzik an thi.

Hih ni thleng hlan ah Saudi Arabia cozahpi cun US ram um a ram mipi pawl a ngaih tuah thu a rak phuang dah ruangah World Tarde Center pahpuak dingmi thuhla theih mi a nei ding ti`n zumnak a rak um.

Curuangah 9/11 buainak kum 19 kim ni bat in US federal Judge in Saudi Arabia cozah hnen ah thusutnak a nei mi a siih US ambassador rakṭuan dahtu Prince Bandar telin minung 24 tal hmai ah suak ih simfiahnak nei dingin thu a phuang.

Saudi Arabia cozah lam cun a hlan ihsin 9/11 ṭum ah hnuaihnih awknak a neilo thu a rak phuang dah zo ih tuṭum thusutnak khal, tutiang, a let hrih lo.

9/11 buainak timi cu misual pawl in vanzam pali hijack in US rampi siatsuah tum ni September 11, 2001 ih thilthleng kohol dingih an hman mi ṭongkam a si.

Cuih ni ah misual pawl in World Trade Center innpi cu vanzam pahnih thawn an pahpuak. Vanzam pakhat cun Pentagon innpi a pah. Vanzam pakhat sawntu cu misual pawl ih siatsuah tum nak hmun an thlengman hlan ah vanzam totu mipi pawl in misual pawl cu a burbur in an zawn. Vanzam totu mipi cun misual pawl cu nunnak thap rorin an sual ih an tomi vanzam cu Pennsylvania ah a tlak ih a puak ruangah a totu hmuahhmuah an thi thluh a si.

Leave a Reply

Your email address will not be published. Required fields are marked *