$2 Hlawh ṭhan dingin Amazon neitu Inn hmai ah Duhphorhnak nei

Congress of Essential Workers timi pawlkom hohanak in Amazon dintu le CEO a si cih mi Jeff Bezos um nak, Beverly Hills, California ih a inn hmai ah minung 100 hrawng in duhphorhnak an nei.

Covid 19 lak ah hnaṭuan pawl humhim ṭha ding, June thla ih titawp zo mi Covid 19 boruak sungih nazi pakhat hnaṭuan man $2 ṭhan dah mi cu Covid 19 boruak tawp tiang ṭhan sal ding tvk dil in duhphorhnak an nei ih “Jeff Bezos kan ṭul lo. Amah in, in ṭul sawn. Kan mah hnaṭuan pawl in leitlun milianbik ih kan can ter mi a si” ti`n duhphorhnak ih hruaitu pakhat in a sim.

Congress of Essential Workers cu Amazon company zungṭek ih assistant manager rak ṭuan dah Christian Smalls ih din mi pawlkom a si ih duhphorhnak ah labor activist ṭhenkhat le Amazon ih hnaṭuan mimal an tel tiah US ramsung media ṭhenkhat in an ngan.

“Kan dil mi ah Amazon ih hnaṭual pawl hlawh ṭhan, Medicare, childcare hrang ṭha thei bik ih tawl rel sak ding tipawl a tel ih, hivek pawl cu second khat ih $4,000 paisa laklut thei, leitlun milianbik Jeff Bezos le billionaire dangdang pawl in an hrang ih hnaṭuan pawl hrang tawlrel sak thei tuk mi a si tin kan ruat” tiah duhphorhnak ih telve mi pakhat in businessinsider hnen ah a sim.

Duhphorhnak thu thawn pehpar in businessinsider in Amazon ṭuanvoneitu pehtlaih a tum nan khat lam in letsalnak a um lo.

Kan dung zarh ih thuthang suak vek a si le Amazon hnaṭuantu mipum 19,000 lenglo in Covid 19 nat an kai ti a siih mithi um zet cu company sungṭuan lak khal ah fiangfai in simthanawknak a um lo.

Amazon lam cun company hnaṭuan minung 10 hrawng cu Covid 19 ruangah an thi ti`n NBC News hnen ah a sim nan media ṭhenkhat cun mi 100 tal an thi ti an zum thu an tarlang.

Leave a Reply

Your email address will not be published. Required fields are marked *