The Passion of the Christ: Resurrection timi Zuknung thar Zuk An Tum

Kum 2004 ih suak mi zuknung hminthang “The Passion of the Christ” cu a suak hnu kum 16 rei hnu ah a pehzom an zuk tum bet thu theih a si.

Zuknung sungih Jesus lem cangtu Jim Caviezel cun “Writer/director Mel Gibson in ‘The Passion of the Christ’ zuknung pehzom dingmi a ngan rero lai” ti`n Breitbart News hnen ah a sim ih “a zuk pathumnak in kuat zo ih a cian ngan sung mi tla in kuat ding. Zuknung hmin cu ‘The Passion of the Christ: Resurrection’ ti a si ding” a ti.

The Passion of the Christ director Mel Gibson

Kum 2004 ih suah mi The Passion of Christ zuknung cu $30 million budget thawn zuk mi a siih hlawhtling zet dingih ruah mi a rak si lo. Asinan a mai’ san lai, zuknung khawvel ih pre-ticket zuar khawng bik ah a hung cang ih $622 million lenglo a lak lut. (Tu ahcun kum 2015 ih suak mi Star Wars: Episode VII – The Force Awakens in a lan)

Jim Caviezel cun “‘The Passion of the Christ: Resurrection’ cu Jesuh thlaan ihsin a tho sal nak in ṭan a si dingih kan zuk suak cun Leitlun ih zuknung ropibik a si ding” a ti.

Jesuh lem cangtu Jim Caviezel

“The Passion of the Christ” zuknung danglamnak
Jesuh lem cangtu Jim Caviezel cu 150lb cross a phur nak ah a liangruh a pelh (Flim sung khal ah an ti lang)

Jesuh in Tlang par ih Pathian thu a zirh lai an zuk ṭum ah le Cross ih an khengbet lai an zuk lai fangah cangtupa Ṭek in a tlak ih a sam a kang. Asinan, mangbang thlak zetin a khawngaw/ahliamaw lo.

Cross ih kheng lai an zuk nak ah cangtupa a khuasik tuk ih hypothermia le pneumonia a ngah phah thluh.

US ram ih Ṭongdang zuknung hlawhtlingbik a siih Leitlun huap biaknak lam zuknung hlawhtlingbik khal a si.

Cross ih khengbet lai an zuk ṭum ah Cross par ih cangtupa cu a taksa a pool thluh. Mithiam pawl cun Cross ih hremtuar misual pawl thizik lai fang ih an taksa umdan vek ciah a si an ti.

Jesuh hrem lai lem an cang nak ah Cangtupa an vuak ngah taktak ih tuni tiang a zaangruh kiang ah 14-inch hmape a um lan ta.

Zuknung an cang hlan ihsin thilmak an tong nasa tuk ruangah director Mel Gibson cun zuknung an cang ding ni thok in zukih tel hmuhhmuh cu Canada puithiam hmang in thlawsuah a pek ter ta.

Judas Iscariot lem cangtu atheist Luca Lionello

Film an zuk sungih an hmuhton mi ruangah Bawi Jesuh hremtuding ih an hman mi Muslim actor, Judas Iscariot ih cangtu atheist Luca Lionello le zuknung sung ih tel minung tamzet cu an piangthar ih Christian ah an lut.

Italy eam ih an zuk lai fang ah cangtupa ṭek in a tlak hnu minute 5 reihrawng ah Assistant director Jan Michelini cu Ṭek in a tlak ve. Film an zuk pek khal ah Assistant director cu Ṭek in a tlak dah ih a kut malte a kang.

Assistant director Jan Michelini

Malaysia ram ah “Passion of the Christ” zuk nung an kham ti`n thuthang a suak nan a tak ahcun an rak kham lo. Asinan Malaysia cozahpi in Christian lawng a zoh siang ih Christian biakinn ṭuanvonei lawng ticket a zuar siang.

Zuknung hmin ah “The Passion” ti lawng ih suah tum a rak si nan Miramax studios in “The Passion” timi zuknung dang tuah lai mi a nei ruangah “The Passion of Christ” tiah a hmin an thleng sal.

Bawi Jesuh lem cangtu dingah “Home Alone” timi Chrismas background zuknung cangtupa Macaulay Culkin hman an tum lawk nan a nonal deuh ruangah rem an ti lo ih cangtu ding an thleng sal.

Zuknung ih laklut mi $100 million cu director Mel Gibson in Traditional Catholic Movement hrang ah a hlu.

Ahlawhtling tukih R-rated film hrang worldwide box office dinhmun sangbik a rak si nan Kum 2016 ih suak mi Deadpool zuknung in a hung lan leh.

“The Passion of the Christ” zuknung zoh ruangih piangthar an tam zet.

Hram:IMDB

Leave a Reply

Your email address will not be published. Required fields are marked *