Singapore hnak ih tum sawn mi Vur beuh pi cun South Georgia lam a pan vivo

Singapore ram hnak ih tumsawn mi Vur beuh sinmi cun siatralnak thlen thei dinhmun in South Georgia tikulh lam a pan vivo tiah Science thewire website in a tarlang.

Iceberg A68a tiih koh mi cuih Vur pi cu Antarctica leilung ṭhen (Antarctica continent) in kum 2017, July thla ah a beuh phel mi a si ih a umnak hmun saklam a pan vivo.

Tu ah, Siil nga (Seal) le penguin rannung tlanlennak South Georgia tikulh lam a pan vivo ih cuih hmun le Iceberg A68a an khawngaw cun siatralnak rapthlak suakthei dinhmun a si.

“Scientific san thuanthu ah South Georgia tikulh lam pan mi hivek thil tum kan hmu dah lo. 4,200 square kilometres a si ih Singapore lole Luxembourg hnakin a tum. Iceberg tamsawn cu tipi thuanthum par ah an phel kuai thluh ṭheu. Nan, Iceberg A68a cu mangbang thlak zetin a mahten a phel kuai thei lo” tiah British Antarctic Survey ih telvetu biological oceanographer Geraint Tarling in a sim.

Geraint Tarling cun “thil cang thei phun 2 a um. Pakhatnak cu South Georgia tikulh kiang hrawng a thlen in hmun dang ah a pial thei. Pahnihnak cu penguin rannung million 2 lenglo hrang ah a ṭihnung zet. Iceberg A68a cu South Georgia tikulh a thlen tikah tipi thuanthum tawdeng hrut ngah in a cawl thei. Cutikah million 2 lenglo penguins pawl cu an fa le ei ding rawl an hawl nak tipi thuanthum thawn an hlatawktuk ding. Rawl eiding a um lo tikah an cii khal a mit thei”.

“Cuih tlun ah tipi thuanthum boruak hlum/dai zirih ummi rannung pawl cu Vur zup mi tithiang pawl in a siat suah thei” a ti.

Antarctica cu Leitlun boruak thlengawnak ruang ih hmun hlum cakbik pakhat a si ih cuih hmun ih Vur pawl cu a ninii in an zup ral vivo.

Vur zuptii pawl cun tipi thuanthum a ti ṭhang ih Leilungpi hrang ṭihnung dinhmun tiang thlenter theitu a si.

Leave a Reply

Your email address will not be published. Required fields are marked *