Mindat Mipi in Martial Law cohlang lo

Mindat ah meithal hmetpuak in doawknak a ṭan sal hnu May 13 ah SAC ralkap in Martial Law an phuang nan mipi ukhruaitu pawlkom in an cohlang lo thu ca in an suah ve.

SAC ralkap le CDF Mindat karlak kahdocawlh thutiam an nei mi cu May 12 ah ṭhiatbal in kapaw thoksal a si ih ralkap lam in duhsahten cangvaih thei dingin May 13 ah Martial Law an phuangmi a si.

Martial Law thusuahnak ahcun khuatlang remdaihnak hrang ah Mindat khua ukhruai thuneihnak cu pengṭhen ralbawi hnen ah ap thluh a si ih boruak ih zir in le a ṭul dan ih zirin amah bulpak telin siseh, ralkap bawi thupeknak khalin siseh a cangvai thei a si tiah an tarlang.

Min Aung Hlaing hohami ralkap in rampi ukhruai thuneihnak an la hnu ih dinsuahmi Midat mipi ukhruaitu pawlkom khalin Martial Law an cohlang lo thu le mahte ukhruaiawknak “Daan” an hmang sawn ding thu an phuang ve.

Cumi ah “2021, February 1 ih rampi ukhruai thuneihnak latu ralkap ukhruainak cu rampihuap mipi in an cohlang lo thu, Duhphorh cangvaihnak ruangih kaihkhih tuar mino 7 thlah zalen duhlo ruangah kahdonak a suak thu, Mindat ih Martial Law phuanmi an cohlang lo thu le mahte ukhruaiawknak an nei pehzom ding thu an tarlang a si.

Tuhrih tiangah Mindat boruak cu sosang zetin a lang ih SAC ralkap khalin hmainor vivo tum in le Mindat humhimtu CDF lam khalin khuapi hum pehzom in kaphnih karlak kahdonak nasazet a suak pehzom thei a si.

Leave a Reply

Your email address will not be published. Required fields are marked *