Falam Khuasung Ziinpi Tuah Ṭhat Ṭul Mi Pawl – Dr. Run Bik

Tui ziinpi bik Cinmual OPD, Baptist FBC Biakinn ihsin Tlanglo tlunta I Pu Dar Lian Uk inn tiang hi cu FBC biakinn thlang ti lo cu budget tampi a um hnu kum 3 kum 4 hngah theih mi a si.Tutikcu ahcun Cinmual phei khal ah feet 2 ihsin feet 6 kauh theinak a tam pi.

Tlanglo thlangta zinpi khal feet 2 hrawngih tikauh i cang dawl that i Pathang Khan tlunta ziinpi vun peh thei a cak um tuk. Lehhnu ah kau le ṭha i tuah leh ding cu Cinmual Pu Tawk Sang pai` inn ihsin Vankau sohnak ziin hi a si. Lehhnu ahcun hi ziin hi Var lam ihsin motor tum pawl khawsung I luh tir lo I hi ziin zawh tirnak ding ziin a si.

Hmanhmawh ih ziin kau tuah ding mi cu Vankau ihsin Kambawzah bank lam I suh thlaknak ziin hi a si ding. Acozahpi cun lamziin pawl hi pi 34 in kau sehla ti a duh nan Falam vek I tlangpar hmunhrap khua ahcun a cang thei lo. Voikhat, Falam municipal chairman Pu Dar Lian Uk in I sim dah I, meeting ah kan ziin pawl hi feet 30 I kauh siseh ka ti nan 27 pawl in in neh a ti. Tui` feet 34 le 20 cu rel hlah feet 12 fang umnak hmun 3 a um.

Cui motor ziin pawl cu KBZ bank I an engine bun nak hmun hi a si. Hi tawk hi feet 8 lai tal I kauh theih a si ti keimah rori in an engine sak ah ka kai dah. A pahnih nak cu Lah-Wah-Kah sak I ziin bi hi a si I, ziin thlang I innsaktu pa in innhmun in pek ahcun ka ṭhawn ding a tinak kum 3 tlun a rei zo. Asinan a acozah lam in an ngahsak cuang lo.

A pathumnak cu hi tawk sak ah a si ih ziinsak I lamziin lam I cang an run nawr mi hi a tluan in feet 4 lai ziin kauhnak ah lak ding a si. Cule a thlang lam ah cang dawl in hi ziin tet zet hi feet 8 lai ih kauh a theih ding.
Hi tawk ziin a bit tuk ruangah kan dung Falam meikang ah meithat motor pawl hitawk zawh ngam loin Cinmual lam in an hel ih minute 15 lai an rei bet phah.Cuiruangah hi KBZ Vankau ziin hi cu kum 1 sungih tuah ṭhat teng teng ding a si.

Cule meikang cakkhai le thil poimawh dang I motor feh cak tir ṭulnak dingih ziin kauh ṭulnak cu FBC cangdawl pi le Ngun Luai inn sak I ziin bi tuk hi a si. Biakinn tual hi phar ihsin feet 30 (a hrek cun feet 32 an ti) a kau ih, Lamziinpi hrangah feet 6 hmang sehla, tual feet 25 lai a kau lai ding. Hitawk zin kauhnak ahcun ralrin a ṭul kei` JCB hmang lo in kut i laih thlak a tul ding.

Cule a cang feet 30 I sang dawlnak ah thir iron rod pawl hmang in 90’i hrap in dawl sehla tui slop in an dawl mi ihsin feet 2 kan nei bet dingih feet 28 I kau ziinpi kan ngah ding. India Simla khua cu Falam vekih tlang ram an si ve ih 90′ in pi 40 tlun sang an dawl mi ka mit in ka hmu I tu ah thla zuk ka nei. Falam FBC cang feet 30 I sang ziangah so kan tuah thei lo ding?

Ziin kauh ṭul zet lehmi cu Pu No Sun, Pu Mang Lian Ham pawl ih dawr tluan ziinbituk hi a si ding. Himi thu hi kan dung kum 6 lai ihsin Falam Post ah le Chinland Herald tla ah ka rak ngan theu. Hi tawk I ziin hi a sak lam ah a mal bik feet 4, a thlanglam ah feet 1 i tikauh a theih ding.

A saklam kha inn nei pawl I phar le ban cu dai lo in ziin tikauh a si ding. Tidai luannak cu tha tei tuah thotho a si ding. A thlanglam khal ah acozah paisa in RC i cangdawl bet cun feet 1 cun a kau thei. Cuti cun hi tawk ziin cu tu hnak I feet 5 i a kauh cun a nuam law law ding a si mai.

Cangantu – Dr. Run Bik
zuk – TTT Life

Leave a Reply

Your email address will not be published. Required fields are marked *