Covid 19 Vaccine Tlangzarh dingin Walmart company pi a cangvai thok

Leitlun ih retailer tumbik pakhat a si mi Walmart company cun US ramsung ih Covid 19 vaccine hmansian a si veten tlangzarhnak nei thei lohli dingin timlamnak a nei thok.

“American population zaṭek 90 hrawng cu Walmart company dawr pawl thawn peng 10 hlat huap sungih um an siih ramsung Covid 19 vaccine tlangzarh ding ah hin mi thupizet pakhat kan si.”

“Ramhuap hmun tinkim ah tlangzarh ding a si tikah hmunhla ih Sii tlangzarh ding harsa deuh nak hmun pawl ah kan mah kan rak um. US ramsung ah hin Sii vai peeknak inn 5000 luan kan nei” tiah Walmart chief medical officer Dr. Tom Van Gilder in Yahoo finance hnen ah a sim ih “federal government ih thusuah vekin Sii dawt hmasading an timi pawl cu a sangsang ten kan dawt vivo ding” a ti.

Pfizer tuah mi Covid 19 vaccine cu US ramsung ah tlangzarh thok dingin The Food and Drug Administration ih federal advisory panel cun lungkimnak an nei zo ih tuhnu nihnih-thum ah FDA in hman a siang thlang ding tiah zumnak a um a si.

Walmart cun cumi hrang timlamnak a nei thok ih Vaccine retnakding Vurro bur, Siidawtnak, Sii dawt pawl a voihnihnak dawt bet dingmi theihternak tvk pawl a tawlrel cia ṭhepṭhep tiah Yahoo Finance in a tarlang.

CDC vaccine task force ih ṭuanvonei Dr. Anita Patel khalin Covid 19 vaccine tlangzarhnak thawn pehparmi simfiahnak a nei ih “FDA in hmansiannak a pe veten ramsung Siizung le Sii zemsuaknak inn pawl ah doses million 3 zik tlangzarh ding a si.”

“Cumi hrang ah State ih ṭuanvonei le Covid 19 vaccine tlangzarh tuding an partner pawl an ralring zo maw, tlangzarh thei dinhmun an si ngai maw tivekpawl zohciangnak kan nei rero zo” tiah a ti.

FDA in US ramsung ah Pfizer tuah mi Covid 19 vaccine hmansiannak a pe veten ṭuanvoneitu pawl in tlangzarhnak an nei thok cih dingih Covid 19 raldotu Siizung ih hnaṭuan le kum Upa lam couu pek in Siidawtnak an nei cih ding a si.

Tu dinhmun ah US ramsung ah Covid 19 mina 15.7 million an um zo ih cumi ah minung 293K an thi zo a si.

Leave a Reply

Your email address will not be published. Required fields are marked *