UFC 264 ih Conor McGregor Ke kiak cu Mipi an Diriam zet

Lehpan khawvel ih hlawhsangbik Conor McGregor le aralpa Dustin Poirier sualawk nakah Conor Ke a kiak cu MMA khawvel mipi an diriam zet.

An pahnih hin UFC 264 hlan ah voihnih an rak sualaw dah zo ih voikhat fingfing nehnak an co veve.

Tuni, July 11 (IST) ih tuahmi UFC 264 ah voithumnak an sualaw sal ih Conor cangsual in a Ke a ti kiak ruangah Dustin Poirier in nehnak a co.

Conor McGregor le Dustin Poirier thubuai

2021, January 24 ih voihnihnak an sualaw hlan ah Conor McGregor in “The Good Fight Foundation (NGO)” pawlkom ah US $ 500,000 bomnak pe dingin a tiamkam hai.

The Good Fight Foundation pawlkom cu mi harsa hrang fund hawl nakah Dustin Poirier le a nupi in an dinsuakmi NGO a si ih, Conor in a tiamkam vekin paisa a hlu lo ruangah Dustin Poirier cun cuih thu cu internet cahmai ah a pholang. Cuhnu in Dustin le Conor karlak boruak a sosang ih internet cahmai ah nasaten an kapaw.

Voithumnak an sualaw ding ni a kim zikin Conor cun a mizia hlun a suah ih ṭongkam mawi lo zetzet in Dustin le a nupi a ṭong san hai. “Nan nu in instagram ih cakuat cohlang dingin
message in kuat. Keimah i iit hrimhrim ruangah a si. Ka serh a fawp cak si ko” titiangin Conor cun Dustin le a nupi cu khawtlang mipi hmai ah mithmai neilo dingin a tuah hai.

Conor cun cuvekin mi innsang a thangsiat hlei ah “na nupi cu innsangpa sawn a si ih nang cu innsangnu na si.” “Voithumnak kan sualaw ni ah ka lo that lawlaw ding. Na nung nawn lo ding” titiangin awkam por zetin Dustin Poirier a ṭongsan ruangah MMA khawvel mipi in Dustin tei` sungkua an tuarpi zet.

July 11 ah voithumnak an sualaw taktak cu round khat nakah Dustin Poirier in Conor McGregor a nuai neknek hlei ah amahten a ke a ti kiak bet cu MMA khawvel mipi cun an direm zet a si.

UFC 264 cu July 11 (IST) Las Vegas ah ropi zetin an tuah ih leitlun mihminthang Justin Bieber, Machine Gun Kelly, Meganfox, Melgibson …tvk.. pawl in a hmun rorin an zoh hlei ah US President hlun Pu Trump khal a hmun rorin a va zoh ve a si.

Leave a Reply

Your email address will not be published. Required fields are marked *