Mike Tyson boxing a thong saal ding, Roy Jones Jr thawn an sualaw ding

Boxing legend Mike Tyson (kum 54) cun boxing khawvel ihsin a cawl hnu kum 15 rei hnu ah ring sungah a lut tum saal thu le a ra lai dingmi September 12 ah Roy Jones Jr. thawn an sualaw ding thu a phuang.

Asinan, boxing thong pangai vek si lo in exhibition match a si ding ih September 12, California, Carson, Dignity Health Sports Park ah an sualaw ding.

Mike Tyson le Roy Jones Jr

Heavyweight World Champion rak si dahtu Mike Tyson cu a vang lai ah “the baddest man on the planet” tiih rak kawh mi a siih mi cak, boxing thong thiamzet a si. Professional boxer dinhmun in boxing a thong hmaisabik kum 1 sung ah 15-0 record a nei hngalh ih a voi 15 ten knockout hlir in a neh.

Mike Tyson

Viirvat ṭha le a mithong hmual a na tuk ruangah “Iron Mike” tikhalin an ko ih kum 20 le thla 4 a si ah heavyweight champion taikhap ngah in leitlun heavyweight champion nauhakbik sinak record khal a ngah.

2005 kum, Kevin McBride thawn an sualaw ih a caklo ṭum in boxing khawvel in a cawl ih, a record cu 50-6 a si. Voi 50 nehnak record a nei mi ah voi 44 cu knockout hlir in a neh.

May thla hrawng ah traning a nei lai video tawi te, online ah a thlah ih cuih ṭum ihsin boxing khawvel ah a lut tumsaal ti`n thuthang a leng lawk. Cuih ṭum ihsin MMA khawvel titii nak ah a thuhla an rel thok ih, tu ah boxing khawvel ah a lutsaal ding thu a phung cu, a ni kim ding mipi in an hngak hlap zet.

Atu, Iron Mike ih sual dingmi Roy Jones Jr (kum 51) khal mi cak zet a si ih divsion 4 rori ih World Champion rak si dahtu a si. A record cu 66-9 a siih, 2018 kum, Scott Sigmon thawn an sualaw ih nehnak a co ṭum in boxing khawvel ihsin cawh lak ve zotu a si.

Roy Jones Jr

Exhibition Match/Fight cu ziang a si?
Napin khawng awlo dingin le knockout ko thong awlo dingin pangai boxing thongnak kutbun hnak ih tummi kutbun an hmang ih a nem mi lukhuh khal an hmang.

A tlangpin, non-profit a si ṭheu ih sualawnak ih an ngah mi paisa cu mi harsa bawm nak ah an hmang ṭheu. Pulic entertainment hrang khal ah an thongaw ṭheu ih an neh/cak lo khal le professional boxing record ah an khum tel lo.

ref:Wiki

Leave a Reply

Your email address will not be published. Required fields are marked *