YouTube in Mipi hrang ih ṭangkaizet dingmi Feature thar a hmang thok

YouTube cun a platform hmangtu khat le khat upatawton theinak dingin le huatawknak ṭongkam tifai tum in tuizing December 7 ihsin YouTube comment section hrang feature thar a hmang thok.

“YouTube ih comment mi pawl kan zoh tikah ṭongkam sia hmanmi tamzet kan hmu ding. Cuvek huatawnak ṭongkam, ṭongkam sia an comment tikah comment section ah lutter cih lo in kan block lawk. Cumi ah ‘upatawton dingin le ṭongkam mawi hmang dingin ralrin theihternak catawi kan lang ter”

“Asinan, an duh ahcun ṭongkam mawilo hmang in an comment thei thotho. Ṭongkam an hman mi a mawi lo zia, thil post tu le comment siartu a riahsiatter thei zia kan theiter mi sawn a si ih an duh ahcun an comment thei thotho.”

“Cun, YouTube ih video thlah ṭheu pawl hnen ihsin feedback kan dong tambik cu comment section ih negative comment thawn a pehpar aw. Comment section hi Video tuahtu pawl hrang ih thupizet pakhat a si ih viewer pawl thawn pehtlaihawknak an nei nak hrang ih thupizet pakhat khal a si. Cuvek ruangah le Cyber bullying demterdueh beisei in YouTube feature thar kan tuah mi a si” tiah YouTube Product Management Vice President Johanna Wright cun YouTube comment section hrang feature thar an tuah mi cu US ramsung media hnen ah a sim a si.

Google support team ih hnaṭuan Sarah khal in “Tuizing in YouTube hrang feature thar kan hmang thok. Cumi cu comment tu pawl hrang ih reminder pakhat a siih khat le khat upatawton dingin kan tawlrel mi a si. Tu ah cun Android hrang lawng a si hrih ih Android thawn ṭongkam mawilo hmang in YouTube ih an comment tikah a hlan vekin a post aw cih lo ding. Ṭongkam mawilo an hman mi theihternak reminder a lang ta ding. Cuhnu ah an duh cun an comment thei thotho” a ti.

Cuhlei ah YouTube cun Live thlah ṭheu pawl hrang ah comment remtheinak tool thar khal a tuah sak a si.

Leave a Reply

Your email address will not be published. Required fields are marked *