Tipithuanthum tawdeng ih Leikua “Green Banana hole” sungah Lut an tum

Tipithuanthum tawdeng ih feet 425 thuk, leikua (Blue Hole/Sinkhole) umdaan zirnak/zingzoinak nei tum in Scientists pawl an lut tum.

Florida thawn hlattuk lonak, a thuklam 155 feet tipithuanthum tawdeng ih ummi leikua a siih a sungah ziang a um, nunnak nei mi rannung teh a um maw, minung ih hmudahlomi nunnak nei teh an um pei maw, timi zingzoi, zirnak nei dingin Scientists pawl an lut tummi a siih August thla sung ah lut thei an tum.

An luh tumnak tipithuanthum tawdeng ih ummi leikua cu Green Banana Hole tiin an ko ih feet 425 hrawng a thuk.

Leilungpi zaṭek 71% cu tipithuanthum a siih minung kan thleng hrik lonak hmun zaṭek 95% a um lai ti`n mithaim pawl cun an sim ih, a tu an lut nakding blue hole khal asunglam thuhla zianghman theihmi a um lo.

Atu leikua ih luttuding pawl cu kum 2019, Florida, Sarasota tipi sungih leikua “Amberjack” timi sungih rak lutdahtu pawl an siih an lakih ṭuanvonei pakhat cun, “Green Banana kua ah voikhat kan lut nak ding a siih hmaisa kan lut nak Amberjack thawn ziangvekin an dangaw timi kan theicak zet.”

“A hlan kanlutnak hnakin a thuk ih a pianhmang khal a danglam. Asung ah ziang a um ding ti khal kan thei lo. Exploration timi a nuamnak cu hmun thei dah lonak ih va feh kha a si” a ti.

Hivek, tipithuanthum tawdeng ih leikua hi leitlun hmun tamzet ah a um ih a lut ding, ṭih khal a nung zet. Sinkhole tamzet ahcu in-ti ih hmang theimi tidai thiang a suak ṭheu ih, a tui` an lut tumnak khal Florida underground tidai system thawn pehzomawnak a nei maw timi khal zoh phah an tum a si.

Green Banana Blue Hole sungih lut tuding scientists pawl cu U.S. Geological Society, Florida Atlantic University, Mote Marine Laboratory, Georgia Institute of Technology ih mithiam pawl an siih US cozah kaihhruaimi National Oceanic and Atmospheric Administration pawl ih bawmnak thawn lut tummi an si.

“Green Banana” timi hmin cu zo in a rak sak tikhal theih a si lo ih, a kiangkap ih umtu pawl cun a leikua kiangah banhla hring a phuanaw mi tamzet an rak hmudah ruangah Green Banana tin an ko a si an ti.

ref:liveScience,PopularMechanic

Leave a Reply

Your email address will not be published. Required fields are marked *