Tibetan Vur lak ah Mithiam pawl ih hmudah lomi Khuahlan Virus ci 28 an hmusuak

Kum 15,000 hrawng reizomi Tibetan tlaangsang par hmunrawn pi ih tikhal pawl cu leitlun boruak/nikhua thlengaw ah zupral in a sawnaw vivo. Hih hmun ih tidai khal (Vur) ah hin mit ih hmuhtheihlo thilnung fate million tamzet an khal cih.

Cuih vur lak ah ziang a um ding timi thei duh ah US le China scientist pawl in Kum 2015 ah meter 50 thuk an virh.

Scientist pawl cun kum 5 rei hnu ah cuih Vur lak ah khuahlan virus tamzet a um mi an hmusuak. Cumi virus pawl lak ah science khualvel mithiam pawl ih hmudahlomi virus group phundang 28 an hmusuak ih cumi hmuhsuahnak thar an nei mi cu ca ah ngan in tlawngkai nihnih ah online ah an tlangzarh.

Hih hmuhsuahnak hin kan leilungpi boruak rak umdan, nikhua um dan pawl zirzoi a theih ding zum a um ih scientist pawl hrang ah thil thupi zet pakhat a si. Khuahlan virus pawl hin kan leilung nikhua boruak thlengaw mi ah ziangvek thilnung pawl an nung/thi ding ih ziangtin kan leilungpi boruak a um thei timi khal a khih hmuh thei a si. Asinan cuih virus pawl cun natsia an suak ter ding an phang zet.

“Minung pawl ih cangvaihnak hin leilungpi boruak/nikhua a ti danglam vivo ih kum thawngtel ih rak khal zomi Vur pawl an tiral vivo. Cumi ah, Vur zupral mi cun boruak ah natsia suak ter theitu “pathogen” a thlah thei ruangah San thar ih a um dah lomi natsia pawl a suak thei” ti`n scientist pawl ih ca suah mi ah a um.

Scientist pawl ih phan bikmi natsia siding zum um mi cu Siberia ah kum 2016 ah a rak suak dah. Cuih ṭum ah Anthrax tiih koh mi bacterial ruangih cangsuakmi damlonak ruangah Zukneng 2000 luan an thi ih mipum 96 sizung an thleng. Cumi natsia cu Vur khal lak ah kum 10 sung erh pit mi Zukneng a zupral nak ihsin a suak mi siding an zum. Cumivekin Vur lak ih erh khal cih mi khuahlan virus pawl cun natsia an suak ter ding an phang zet.

“Tuhlan ah French ram ih mithiam Rebecca Abergel hohanak thawn kum 30,000 tar zo mi Vur sungih um Virus cu an rak ti nung dah. Cuvek ṭhiamṭhiam in Vur sungih erhpitmi khuahlan virus pawl cun san thar Leitlun ih suak dah kel lo mi natsia an suak ter ding a phan um zet” tiah Bowling Green State University ih professor Scott O. Rogers in a ti.

Hram : Vice

Leave a Reply

Your email address will not be published. Required fields are marked *