Misual in Instacart hmangtu pawl ih Credit card number, online ah zuar sak

US le Canada ram ih an hmang zet mi online bazaar, Instacart company (grocery delivery and pick-up service) customer pawl ih hmin, address, credit card numbers digit 4 le thil an cahnak order history data pawl cu dark web ah an zuar.

Instacart company cun US le Canada ram ah 1 million hnak ih tam customer an nei ih, cu pawl lak ihsin customer 278,531 account data pawl cu dark web store pahnih ah an zuar a si.

Customer information data pawl cu zo in a fir, ziangtin dark web ah a thleng tikhal an thei lo ih, July 22 ih dawr thil cahtu customer data tiang a tel ti`n rinsantlak website pakhat cun a tar.

Asinan, Instacart company ṭuanvo neitu pawl cun an data fir thei ding khawp in customer pawl ih privacy an thlah dah lo ti`n an el ih ṭunvonei pakhat cun, “customer privacy hum ding cu kan ṭuanvo a si. Kan data security khal a ṭha ih customer data information in fir thei kan zum lo. In dawrtu customer thawn pehzomawknak kan nei ringring ih a ṭuldan ih zirin password khal kan thlengter ṭheu” a ti.

Tuhlan khalah online service hminthang company dawr ṭhen pawl ih customer data, dark web ah an rak zuar dah ih cuih information data pawl cu misual pawl in lei in, mibum nakah an hmang in account neitu` paisa tamzet an rak fir sak dah.

Tuṭum, Instacart company customer data leak mi thu thawn pehpar in cybersecurity expert Nick Espinosa cun, “kei mah rori in dark web ih an zuar mi information data ka hmu. Instacart company lam cun a cang thei lo an ti nan, customer data pawl cu tubaite (July 22) rori ih update mi a si” a ti.

Instacart company customers pakhat in, “dark web ih an zuar mi ah ka information data a tel ve. Ka credit card number khal an nei. Kan dawr nak Instacart company fimkhur lo ruangah maw siding? company lam in le zianghman in sim theilo” a ti.

“Instacart customers data cu mipakhat ah $2 ziinin an zuar. July thla ih a dawr tu customer pawl ih information khal a tel. Instacart customer support ah ka biak hai ih an nih cun ‘in dawrnak ih na hman mi account password thawn bangrep mi, apps dang ah na hmang ruangah a si ding’ in ti. Asinan, app ka hman mi ciikim in password dangdang ka hmang thluh fawn. Curuangah himi company cu a him lo a si. Dawr nawnlo dingin ka hman mi account pawl ka cancel thluh zo” tiah Instacart service ihsin thil cah ringringtu customer Chester cun a sim.

Hivek buainak umṭheu ruangah cybersecurity expert pawl cun online delivery service hmang tu pawl cu fimkhur dingin an sim ṭheu ih password thleng, password manager lole two-factor authentication hmang dingin an sim theiṭheu a si.

ref: TheVerge,Fox

Dark Web ziang a si?
World Wide Web cu a si thotho nan Special software thawn lawng lut a theih ih Dark Web website hmangtu pawl cu internet hmangtu pangai vekin olsamten hawl an theih lo. Dark Web cu google, bing, Yahoo tivek search engine thawn hawl a theih lo.A hmangtu tamsawn cu daanlo ih cangvai an tam ih riittheisii, license umlomi meithal, hmang theih thotho mi passport – college degrees lem, credit card fir mi tivek khal an zuar ih mi an that lai live video, mi pawngsual lai video tivek khal paisa pek in zohtheinak hmun a si.

Leave a Reply

Your email address will not be published. Required fields are marked *