Leilungpi hum duh ah Japan in Thing thawn tuah mi satellites a salh tum

Japan hrambun Sumitomo Forestry company le Kyoto University cun Thing thawn salh mi satellites tuah an tum.

Boruak le nikhua phunphun lak ah olaiten a siatral thei lo mi Thing hman dan zirzoinak an nei thok ih kum 2023 hrawng ah tuah suak thei an tum.

“Kan tuahtum naksan cu Leilungpi boruak thiangfaiter duh ruang bikah a si. Boruak par ah satellites siat mi tamzet an um ih a ṭhen cu Lei lam pan in an tlak sal. Leipar boruak daatkhu lak ah a kang nan a ṭhir them pawl cu boruak par ah kum teelin an tang. A ṭhen cu lei ah an tla lan. Boruak borhbahtertu ah an cang.”

“Thing satellite cu Leilung lam pan in a tla sal khalle ṭihnung mi chemical suak loten boruak daatkhu lakah a kang ziamral men ding” tiah Kyoto University ih tlawng saya Japanese astronaut Takao Doi in BBC hnen ah a sim ih “a hmasa ah satellite model kan tuah ding. Cun flight model kan tuah bet ding” a ti.

Tuhlan kum 400 hrawng ih dinsuah a si mi Sumitomo Group ih telve Sumitomo Forestry company cun nisa, nikhua sia lak khal ih olaiten siatral theilo, Thing thawn pehpar mi zir nak an nei lai ih, an tuah ṭuan mi an hlawhtling a si le Thing thawn salh mi satellite tuah hmaisabik an si ding.

Space junk (Boruak ih hnawmhne)
IT san a si vekin spacecraft le satellite cu boruak par ah tuletu thlah rero a si ih a ṭhen cu Lei par ah an tla sal.

Curuangah mithiam pawl cun kan boruak a bal sinsin ding ti an phang zet. Cuhleiah cuih hnawm bal pawl cun satellite thlah thar mi an siatsuah ding ti an phang zet.

World Economic Forum ih tarlang mi vek a si le boruak par ah hin khat le khat pehtlaihawknak hrang ih thlah mi satellite, Television hrang, nikhua tahnak tvk hrang ah Leitlun ram 40 hrawng ih thlah mi satellites 8,900 a um zo ti a si.

Tudinhmun ah Leilungpi hel tu satellite 6000 a um ti a si ih, cumi lak ih zaṭek 60% cu hman tlak nawn lo/hnaṭuan nawn lo an si.

Mithiam Elon Musk lawng in Starlink satellites 900 hrawng a thlah zo ih thawngteel in a thlah tum bet.

Research pawlkom Euroconsult ih hmuhsuahmi ah Leitlun huap in kum tinten satellites 990 an thlah thlang ding ti a si ih kum 2028 ah satellite thlah mi 15,000 a kim ding ti a si.

Leave a Reply

Your email address will not be published. Required fields are marked *