India ram ih Meteorite tlakmi cu Tuini tiang Ziang a si ti An Thei Lo

Kum 2020, June 19 ah Thir ciikhat a si mi meteorite cu Leilungpi khuhtu thli le daattha pahtlang in India ram Rajasthan ah a tlak.

Boruak ihsin Leilung lam pan mi meteorite tamsawn cu Leilungpi khuhtu thli le daattha lak ah a kang ziamral thluh ṭheu.

Asinan, Rajasthan ih tlak mi meteorite cu cupawl pahtlang in June 19, zinglam nazi 7 hrawng ah Sanchore khua ah a tla.

Atla thawm cu km 2 tiang a thang tiah India today in a tarlang ih meteorite tlaknak hmun ih va zoh tu Sanchore khuami Ajmal Devasi cun “a thawmvang ring tukih Vanzam tlakmi awn ah ka ruat” a ti.

Amahcun “zingpit ah a siih a tlaknak kan hawl nan kan hmu thei lohlilo. Caantawkmawi kan hawl hnu ah 30-centimeter hrawng kau mi leivawr a hnor mi laifang tak ah kan hmusuak. Ka inn thawn meter 100 hrawng hlatnak hmun ah a tlak ih kan hmu veten cozah ṭuanvoneitu ka sim thei cih” a ti.

A tleu zet mi Thir ciikhat (meteorite) cu 2.78 kilograms hrawng a rit ih Leilung a thlen hnu nazi 3 tiang a sa vutvo lai ruangah thil puak thei ah ruatin Sanchore khuami pawl an thla phang thluh.

Ahmun ih vazohtu cozah ṭuanvonei pawl cun an ti dai hnu ah Science thiamsang pawl zohciannak neiter dingin bur sungah an khum ih an tlun pi.

India ram ah hin meteorite a tla ṭheu nan tuṭum ih tlak mi cu a dangdai cuang ruangah thilmak pakhat dinhmun in online ah a lar ciamco ih a hmutu hmuahhmuah cu an mangbang thluh.

Science lam thiamsang pawl khalin Thir ciikhat a si ticu an thei nan a sinak dik an sim thei lo. Mangkhungzet ding ih ruahmi a siih a sinak dik theiciang dingin mithiam pawl in zirnak an nei rero lai a si.

Mithiam pawl ih simvek a si le Leilungpi khuhtu thli le daatkhu pahtlang in kum 1 ah Lei par ih thleng, fate tuklo meteorite 500 hrawnglawng an um ti a si. Cumi 500 lakah pahra hrawng lawng an hmu ṭheu ih a dang cu tipithuanthum lole ramṭhing, ramcaar le mihring fehdahlonak hramlak pawl ah an tlahlo ti a si.

Meteorite thawn pehpar in NASA ih hnaṭuan mipakhat cun “Sunvang ih tlak mi cu hmuh a theih lo ruangah khawi hmun ah an tlak ding ti hi sim a har zet. Aṭhen khal an fatetuk ruangah hmuh an har thotho. Zirzoinak kan nei mi ahcu nikhat ah kan leilung par ih Meteorite belcawng tlak mi 48.5 tons (44,000 kilograms) a kim a si” a ti.

Leave a Reply

Your email address will not be published. Required fields are marked *