Hacker in Leitlun Hminthang pawl ih Twitter account, mibumnak ah an hmang sak

Leitlun hminthang scientist, singer, politician tamzet ih Twitter account pawl cu tlawngkai nithum ah misual pawl in an hack sak.

Apple, Uber, Square’s Cash App, Barack Obama, Elon Musk, Kanye West, Bill Gates, Amezon neitu Jeff Bezos, Democratic presidential candidate Joe Biden tvp ih twitter account cu hacker pawl in camkhat sung an hack ngah ih mipi bumnak ah an hmang.

An hack mi Twitter account pawl cu online ih hman theih mi Bitcoin (digital currency) bumawknak ah an hmang sak ih “Covid 19 ruangih harsa, ka mipi pawl bawm ka tum. Kei mai` account ih bitcoin inkuattu pawl cu let khat in ka kuat saalding. $1000 in kuat a si le $2000 na ngah saalding. minutes 30 sung lawng caan na nei” tiin an ngan.

An ca nganmi ah paisa kuatnakding link an ret cih ih Bitcoin transaction receipts vek a si le $113,000 hrawng paisa lutsuak a um maan. Online transaction voi 320 hrawng a um maan tiin Bitcoin thawn pehpar ih ṭuanvo neitu pawl in an sim.

Asinan, hacker pawl ih ca post mi cu hack tuar account neitu pawl in reilo te ah an delete thluhsaal.

Binance CEO Changpeng Zhao in twitter ah buamawknak ca post mi a um thu, a Twitter account in mipi hnen ah a than nan, amah account khal an hack sak ih a ca post mi cu an delete sak lohli.

US president cuhvetu Joe Biden campaign ṭuanvo neitu pawl khal in twitter hack an tuar ruangah camkhat sung account an phit thu le Twitter ih ṭuanvo neitu pawl, pehtlaihnak an nei zo thu an tar lang.

Twitter khalin twitter account tamzet hack an tuar thu kan thei. Zingzoinak kan nei rero lai ih a rei hlan ah a ṭha saalding kan beisei tiin mipi hnen ah an than a si.

Bitcoin timi cu online transaction tuah nakih hman theih mi “digital currency” a si. Kum 2009 ah “Satoshi Nakamoto” tiih hmin peawtu (mi pakhat maw? pawlkom a si tikhal an thei lo) ih tuah mi a siih Bitcoin 1 ih maan cu $ 9,191.15 hrawng a si.

ref:Twitter

Leave a Reply

Your email address will not be published. Required fields are marked *