China in Bualrawn 30 tiat Radio Telescope hmangin Alien hawl thok tum

Van boruak ih siarcawklo arsi le leilung phuncikim ummi lakah kan mah minung vek nunnaknei dang an um pei maw tihi Science community lak ih simfiah theilo thusutnak tumbik pakhat a si.

NASA Hubble Telescope hmuhsuakmi Pillars Of Creation

China ram khalin kan umnak leilung leng ah nunnak nei dang an um pei maw ti`n leitlun ih radio telescope tumbik hmang in hawlsuahnak nei dingin timlamnak a nei rero.

Cuih radio telescope cu Five-hundred-meter Aperture Spherical Telescope lole FAST tiin an ko ih tukum September thla ihsin alien hawlnak ah hmanthok a si thlang ding.

FAST cu 1994 ah China scientist pawl in tuah dingin cozahpi hnen ah a rak dilthok ih 2007 ah siannak ca an ngah. 2008 ah foundation an phah ih 2011 ah ṭuan thok in 2016 ih ṭhehsuakmi a si.

Bualrawn 30 tiat a siih a tuahnak ah US$180 million hrawng an cem. An tuahnak hmun Pingtang County, Guizhou, southwest China ih um khua le a kiangkap ih um minung 9000 hrawng cu hmun dang ah ṭhawn ter an siih Khua ṭhawnnak, inn hmun siat tuar le FAST saknak pawl thawn a zaten $269 million hrawng China cozahpi in a hmang suak.

An sak ṭhehhnu 2016 ihsin test nak an nei ih tukum January ah hmanthok a si zo nan hnaṭuan caksin thei dingin remṭhatnak an nei salbet ih tukum september thla ah hnaṭuan a thok thlang ding.

Leitlun ih radio telescope tumbik a rak si dah mi Puerto Rico ih Arecibo Observatory hnakin a tum sawn ih a hnaṭuandan khal let hnih in a kau sawn. US, UK, Pakistan le China scientist komaw ih tuahsuakmi a siih alien hawl phah in black holes, gas clouds, pulsars tvp zirnak khal ah hmancih a si ding.

Leave a Reply

Your email address will not be published. Required fields are marked *