A cii (gene) rem mi Kawngsang 750 million an thlah ding

Zika, dengue, yellow fever le chikungunya nathrik phurtu Kawngsang dem deuh dingin a cii rem mi Kawngsang 750 million lenglo cu Florida le Texas ah thlah an tum.

Britist company a simi Oxitec ih, cii rem mi Kawngsang pawl cu OX5034 tiin hmin an pek ih kum 2021 ah an thlah thok tum.

Cii rem mi Kawngsang pawl cu thisen zuk hmang lo mi, Kawngsang Pa hlir an siih cu pawl cun thisen zuuk hmang Kawngsang nu pawl, an pawl dingih fa an nei mi pawl cu an u pa man hlan ah an mah ten an thi ding.

Oxitec company ih ṭuanvo nei pakhat cun, “Leitlun ih thil nung hmuahhmuah in pehzom awnak kan nei thluh. Kawngsang khal hi minung hrang ahcun nat sia phurtu ṭih nung an si. Asinan an cii mit ter thluh bang seh la rawl ih hmangtu cepte, vate, tidai ih tlangleng rannung pawl a va tham ban thluh ding. Cuvek dinhmun a si ruangah nathrik phurtu Kawngsang dem deuh dingin kan cangvainak a si.”

“Brazil ram khal ah kan thlah zo ih kawngsang keunak ruangih suak ṭheu mi natnak pawl cu zaṭek 80% rorin a tlaniam” a ti.

2016 khal ah Kawngsang cii rem mi an thlah tum nan, mipi le Environmentalists pawl in ‘minung hrang le environment hrangih ṭih nung mi ah a suak ter pang thei’ ti`n an dokalh ruangah an tuah khuasuak lo.

Asinan atu ahcun U.S. Environmental Protection Agency (EPA), U.S. Centers for Disease Control and Prevention (CDC), Florida Department of Health lam khalin experiment nei dingin an siang zo ih kum 1 sung caan an pe. Kum 2021 ihsin an thlah thok dingih an hlawhtling dan ih zir in an ṭuan peh tum vivo a si.

ref:Anon,reddit

Leave a Reply

Your email address will not be published. Required fields are marked *