Zomi Revolutionary Army in Mizzima ngai dam dil an beisei

Tedim peng, Singlei khua kiang ih Bing hmuan cu CDF – Hualngo ralkap pawl in an sit sak tiah Mizzima in April 9 ah a tarlang.

Cuih bing hmuan cu ZRA (Eastern Command) ta a si tiah tarlang a si ih, cuih thu thawn pehparin ZRA an lung awi lo ih, Mizzima hnen ah ngaidam dil dingin ca an kuat.

Zomi Political Coordination Committee hmin thawn Mizzima hnen ah ca an kuat ih “Bing hmuan cu kan mah tuah mi a si lo” ti`n an sim.

“Tedim peng, Singlei khua kiang ih Bing hmuan cu a neitu ZRA an si ti`n Mizzima – News in Burmese cun diklo zetin in a ngan ih sual in puh”.

“Kan hnen ah thuhla felfai sutnak zianghman nei loin thuthang diklo an suah mi hin Tlangpar hriamkai pawl lakah hmuaw thiamlonak a suakter thei”.

“Curuangah Mizzima in thuthang an thlah nak FB cahmai ihsin ZRA hnen ah ngaidam dil dingin kan ngen” tiah Zomi Political Coordination Committee cun Mizzima hnen ah ca an kuat.

Cuhleiah neta hnu ah hivek puhawknak an tuah bet cun Tlangpar um phunhnam dangdang hmuaw thiamlo dingin thu an tuah hrim ti`n kan pom dingih, a ṭul dan vekin hmalaknak kan nei ding ti`n cakuat ah an ngan tel.

ZRA/ZPCC in Mizzima hnen ca an kuat mi rualin NUG cozah theihternak C.C (carbon copy) an telh cih.

ZRA cun Bing hmuan thuhla kan theih pi lo an ti nan, kan ram a buai hnu, Tonzang peng ah Bing hmuan a karh cak zet ti`n tualsungum pawl in an rel a si.

Mizzama thuthang suahmi kimciangin tanglam ah na zoh thei.

Link >>>> Mizzama thuthang

Leave a Reply

Your email address will not be published. Required fields are marked *