Zingthlapit ah Thailand ram lut Myanmar rammi mipum 200 kim zik kaih tuar

Thailand ram ah daan loih luttu Myanmar rammi mipum 200 kim zik cu November 25 zingthlapit ah Thailand ramri palik le ralkap pawl in an kai tiah theih a si.

November 24 zaanṭim ah Phop Phra district, hramlak ih mibur rual cu ramri kiltu palik le ralkap pawl in an hmu ih tlanhlo an tum lai fang ah ṭuanvoneitu pawl in an kai thluh tiah bangkokpost cun a tarlang.

Mipa 111 le numi 72 an si ih an zaten id zianghman an nei lo tiah palik thusuah sirhsan in bangkokpost ah an ngan.

An zaten Covid – 19 ceekfelnak an nei hnu ah Phop Phra palik zungah kuat in thusutnak an nei pehzom ding tiah an tarlang.

Tuhlan ihsin Thailand ram ah daanlo ih luttu Myanmar rammi an um ringring nan Min Aung Hlaing in rampi thuneihnak a la hnu ah sahimnak hawl in le pumcawmnak hrang ruat in Thailand ram ah daanlo ih luttu Myanmar rammi an pung cuang tiah theih a si.

Cumicun Myanmar rampi tlaksiatlam a pan zia a langter a si.

Leave a Reply

Your email address will not be published. Required fields are marked *