Ziinpi ih suakvak kum kimlo nauhak pawl khal an him nawn lo

Yangon : Thingangyun myone ih um tleirawl Mg Htet Aung Lin (kum 15) cu March 12 ah Kawl ralkap le palik in thihrulh in an thawi.

Amah hi lamzawh duhphorhnak ih telvemi a si lo nan kawl ralkap le palik pawl cun zinglam nazi 11 hrawng ah an kai ih thihrulh in an thawi hnu ah kum kim lo a si ti`n zaanlam nazi 6 hrawng ah an thlah sal.

“Ka tupa te hi ziinpi lam ah hmuk lei dingin a feh ih palik le ralkap pawl in an kai. Nauhak a si thu le lamzawhnak ih telvemi a si lo thu a sim rero hai nan an ngai duhlo ih thihrulh in an thawi hnu ah an kai” tiah Mg Htet Aung Lin ih ni Ma May Thit Saa in a sim.

Cuih kumkimlo Mg Htet Aung Lin cu vuakthawi in an kai hnu khalah nasatak in an thawi bet. Funghreu le meithal tawkawng thawn an sutnak pawl cu a vual teptep thluh. Alu khalah an vuak nasatuk ruangah rawl khal ṭhiṭha ten ei thei lo in a luak rero tiah a sungte pawl in an sim.

Ma May Thit Saa cun “lamzawh duhphorhnak ih telve sisehla cu ruahdan khal a dang thei. Asinan, palik le ralkap ih vuakthawinak cu lamzawhnak thawn hmunhla veng dang ah a si. Atuih an thil ti dan cu lamzawh duhphorhnak ih tello pawl khal kan him nawnlo. Ziinpi ih hmuk lei suakvak nauhak pawl tiang an him nawn lo. Cuvekih dinhmun sia ah kan thleng thlang” a ti.

March 12 thotho ah Mandalay ih kum kimlo nauhak pakhat khal palik pawl in nasa takin an thawi ih an vuakthawi lai video tawi cu online ah a darh thluh a si. (Irrawaddy)

Leave a Reply

Your email address will not be published. Required fields are marked *