Zaw Win Htut fapa Ito le ho an kai dan

Hlasakthiam hminthang Zaw Win Htut fapa Win Htut Thawdar @Ito le mino ṭhenkhat cu SAC ralhraang in September 8 zing ah an um nak inn ah luhcilh in an kai tiah thuthang a suak ih kaih tuar Ito ih sungte pawl khalin thuthang an nemhnget fel zo.

A umnak Yangon, 9 mile, မစိုးရိမ်ကျောင်း ziin kiangkap hi ralhraang pawl in September 8 zinglam nazi 4 hrawngin an phit sak ih Hmun ṭhenkhat ah ṭanṭhat lak cia in timlamnak an nei nan veng sung ih um miṭhenkhat cun thuhla umdan zianghman an thei cuca lo.

Ralhraang cangvaih lutsuah dan rak hmutu pawl cun zinglam nazi 8 luan hrawng ah an kai ngah ding zum a um thu an rel ih “kan theih sun ah, hmaisabikah golf course kiang ih hmun dunglam an phit hmasa. Cun, Hmuan dunglam, tlunlam lamziin ti`n a sangsang ten an phit hnu ah an kai tiah kan thei” ti`n veng sung um mipakhat cun a rel.

Veng sung um mikhat khalin “zinglam nazi 8 hlan ah lamziin an phit ih 8 luan hnu hrawng ah an ong sal. Himi ziin ah vak suksotu an um dah tuk lem lo. Cun, kiangkap naivai deuh ih um pawl lawng in hih hmun ah Ito a um timi an thei. A studio khal hih hmun ah a um cih. Zingpit ah an hmuan sungah ralkap an cangvai rero mi kan hmu” a ti.

Midang pakhat khalin “Ito inn ah SAC ralhrawng pawl an lut tilawng kan thei. An kai thu cu thuthang a suak hnu lawng ah kan thei fiang” a ti.

Ito an kaih nak san thu felfai theih a si lo nan ramsung media ṭhenkhat cun Dothleng cangvaihnak thawn pehpar in an kai mi siding zum a um thu an tarlang a si. (Lawrkhawm)

Leave a Reply

Your email address will not be published. Required fields are marked *