Zarh 2 sungah Myanmar ram ah Covid 19 mina 359 hmusuak
Kan ram Harhdamnak le Lehpannak zung in 2020 August 29 zaan nazi 8:00 ih thu a than mi ah Covid-19 mina 77 hmuhsuah bet a si ih, Suarhnihnak a karh zual thok ni August 16 ihsin tuizaan tiang ah Covid 19 mina 359 an hmu zo a si.
Myanmar ramsung nat karhzai sinsin ding phan a um ruangah ramsung ih khua ṭhenkhat pawl ah Lockdown ṭansal a siih, July 21 ih ongsal mi Suakthuan tlawng hmuahhmuah khal, August 27 in phit thluh sal a si zo.
Covid 19 nat dokham theinak ding hrang ah mipi pakhat cio in daithlang a ngah lo tiah rampi harhdamnak zungin thuthannak an nei ih ramsung hmun tam zet ah loud speaker bunmi mawṭaw thawn tlang-aunak an nei rero a si.
Covid 19 suarhnihnak ih nathrik cu hmaisata ai in let 10 hrawngih suanawk a ol sinsin ruangah le taksa parah natnak pianhmang a lang cih lohlilo ruangah ralring a ṭul sinsin tiah Kan ram Harhdamnak le Lehpannak zung in thu a than a si.
Tu dinhmun ah Myanmar ramsung ah Covid 19 nat kai mipum 733 an um zo ih cu pawl lak ihsin mi 6 thi in mipum 347 an dam sal a si.
