Yangon khualipi ah Nazi 11 sung internet phit an tum – ACSRangoon

Yangon ah Nazi 11 sung internet phit an tum cu Mipi lam khalin cangvaih kekar dan thleng an tum

Rampi huap mipi in February 22 ah nasa zetin duhphorhnak an nei tum ruangah ralkap pawl cun duhphorhnak neitu mipi tambiknak Yangon khualipi ah nazi 11 sung internet phit an tum.

Kawl ralkap in Myanmar kumpi cozah thuneihnak a la hnu ah a khaatkhaat in
internet a phit ṭheu ih kandung zarh hrawng khan nitin deuh thaw zinglam nazi 1 in 9 tiang internet a phit thok.

Tu ah, nazi 8 sung internet a phit ṭheu mi duh tawk loin Yangon ramṭhen ah nazi 11 sung rori internet phit an tum cu a si.

Duhphorhnak neitu mitamzet le ramsung media pawl cun ramleng lam in kan ram buainak rak hmu theive dingin duhphorhnak an nei lai ah live video an thlah ṭheu.

Cumi ruangah February 22 ih mipi tingtel duhphorhnak nei tummi cu live thlah theilo dingin ralkap pawl an cangvai tum ih nazi 11 sung internet phit an tum.

Himi ralkap cangvaih tummi hin mipi lamzawh duhphorhnak a khawngban ding phan a um ruangah ramsung mipi pawl cun internet a ngah hnu nazi 12 hnu lam sawn ah duhphorhnak nei ṭan dingin social media ah simthanawknak an nei a si.

Leave a Reply

Your email address will not be published. Required fields are marked *