Yangon : Phaunggyi Siizungpi ah Covid 19 mina Tlem Nawn Lo

Covid 19 suarhnihnak in Myanmar ramṭhen a nuai thok ih mina a ni nii in an karh vivo ruangah ramsung Covid 19 mina tuamhlawm tambiknak Hlegu Township, Phaunggyi (ဖောင်ကြီး) siizungpi ah mina an tlem nawn lo ih ṭuanvo neitu pawl in siizung kauh danding an tawlrel tiah Myanmar Now cun a tarlang.

“Siizungpi ward 7 ah Covid 19 mina an khat thluh. Tu dinhmun ah mina an karh vivo nan buainak umhranloten kan enkol thei hrih. Covid 19 mina kan enkol mi mipum 700 an luan” tiah Phaunggyi sibawipi Dr. Ko Ko Naing cun MN media hnen ah a sim.

Covid 19 confirm mina pawl cu ဝေဘာဂီ, တောင်ဥက္ကလာပ le ဖောင်ကြီး ti`n hmun thum pawl ah an kuat ih ဖောင်ကြီး siizungpi ah an kuat tambik.

Phaunggyi siizungpi ah September 2 ni in Covid 19 mina an kuat thok ih ni 10 sung hrawng ah mina 700 an luan zo.

“Nitinten mina thar 100 hrawng an um ringring. Mina tuamhlawm tuding volunteer khal an tam vivo ih siizungpi khal kauhbet danding kan tawlrel a si” tiah Dr. Ko Ko Naing cun a sim.

Phaunggyi Siizungpi ih mina kuat tawlreltu U Soe Than khal in,”tudinhmun ah Phaunggyi siizungpi ah Covid 19 mina an tamtuk ih umnakding hmunram an tengaw nawnlo ruangah siizungpi area sungih inndang pawl khal mina retnak dingah an tawlrel rero” a ti.

Myanmar rampi ah September thlathok ihsin Covid 19 nathrik kai an karh vivo saal ih September 12 ni lawngah nathrik kai thar minung 351 an um.

Tufangah rampi sungih natnei hmuh tambiknak hmun cu Yangon ramṭhen a siih nathrik nei minung 1300 an hmu zo.

Rampi huap in, September 13, 2020 tiang Covid 19 mina 2,796 hmuhsuah a si zo ih hmuhsuah zo mi mina 2,796 ah 16 an thi ih 676 an dam sal a si.

Leave a Reply

Your email address will not be published. Required fields are marked *