Yangon : Minute 10 sungah Voi 3 accident a suak ih Minung 5 an thi

Tuzing, 3 August, zinglam nazi 7:50 ihsin nazi 8 karlak, Yangon–Mandalay Expressway ziinpi ih hmun 3 rori ah motor bahkhawnnak a suak ih motor totu minung 5 an thi thu theih a si.

Hmun 3 ih bahkhawnnak suak mi cu minute 10 sung ih thil thleng a siih, zinglam nazi 7:50 ah ziinpi peng 176 kiangah motor a tluk ih a totu minung 6 lak ihsin mipa 1 le nunau 1 an thi.

Zinglam nazi 8 hrawng khalah ziinpi peng 336 kiangah motor a tluk ih a totu mi paruk lak ah nunau 2 (kum 14 le 18) le motor mawngtu mipa pakhat an thi a si.

Tuzing nazi 2 hrawng khal ah ziinpi peng 328 kiang ih lamziin kaantu mi pakhat cu motor in a pah ih a hmun rori ah a thi cih ih, a mah tel in tuzing lawng ah himi ziinpi par ah bahkhawnnak rungih mithi mipum 6 rori an um.

“Furpi a si vekin ruahsur ruangah lamziin a nal ih motor an tolh duh zet. Tuni khalah ruah a sur rero ruangah ziin a nal zet ih bahkhawnnak a suak a si” tiah Yangon–Mandalay Expressway meithat ṭuanvonei pakhat in Duwun hnen ah a sim.

Leave a Reply

Your email address will not be published. Required fields are marked *