Yangon : Mawṭaw cycle hrang ah Datsii zuar nawn lo dingin thu an suah

Yangon khualipi ih private ceet-sii zuar pawl cu June 9 ihsin mawṭaw cycle datsii zuar nawnlo dingin Ministry of Electricity and Energy in thu a suah tiah theih a si.

Mawṭaw cycle to in bomb puah hmang an um ruangah le Yangon khuapi sungah mawṭaw cycle to kham ding hmalaknak nei thok in SAC ralhraang in thu a suahmi a si tiah Yangon ih MPE zung hnaṭuan mipakhat in a rel.

Amahcun “Saihluam pakhat thawn vate pahnih sai that tum vek deuh khi a si. Cutiih thu an suah cu mawṭaw cycle to ih cangvaitu an deem deuh ding tiah an ruat. An mah in teh an thluh thei ngai pei maw? kan rak zoh hnik pei cu.”

“Hitiih daan an suah thar cu a atthlaktuk. Khuaruahnak an nei lo. Datsii le ziinan tivek hi mawṭaw cycle hrang lawng ih hman theih ah maw an ruat?” a ti.

Hitiih thu an suah cu ceet-sii thawn pehparmi black market a suak ding zum a um thu le eiruknak tam sin ding zum a um thu Yangon Electric zung ih CDM tuahtu cozah hnaṭuan mipakhat in a rel.

Amahcun “Dawr tum zetzet in a hlomhlom in an zuar nan, cuvek pawl cu ceetzung company picang tivek lawngin an lei thei. Company tenau hrang le inn hman ding tivek cu license umlo khalin a thupten an zuar thup thlang ding. Cuvek daankalh thilthup tuahtu an kai tikah paisa thawn thamaw in eiruknak a um tam sinsin thlang ding. Netalam cun mawṭaw neitu pawl in private ta an lei dingih vengsung tivek ah mankhung zetin an zuar sal leh thlang ding” a ti.

May 9, zinglam nazi 12 ihsin zuar kham thok ding ti a si nan Dagon Myothit ih datsii leitumtu mipakhat cun May 8 ah lei ka tum nan in zawrh duh nawn lo a ti.

Amahcun “kan nih miharsa hrangah tuvek caan ih kan hman ṭangkaibik cu mawṭaw cycle hi a si ih sumsaw cemliam khal a zia um zet. Nan, tuahcun hnaṭuan fehdanding khal a lai thluh. Kan ram boruak ah kaihkhih thei ringring kan si hlei ah bus to ding harsa le paisa cemliamnak in inhmuakbet a si ko” a ti. (Ayeyarwaddy Times)

Leave a Reply

Your email address will not be published. Required fields are marked *