Yangon khua Laili hmun dangdang ah bomb a puak

Tuni, July 22 ah Thailand ziinan company PTTEP zungṭhen pakhat telin Yangon khuasung ih um ralhraang ralkap thawn pehparmi hmunram dangdang ah mipi ralkap pawl in bomb an puah.

Zinglam nazi 10 hrawngah Mayangon, Sei Myaung lamzin ih um PTTEP zung ah bomb a puak ih khawngaw le hriam tuar cu an um lo nan zung hnaṭuan pawl an thinphang zet tiah tualsungum mipakhat in ramsung media hnen ah a sim.

“PTTEP zung, floor 1nak, mawṭaw parking ah bomb an puah. Ralkap le palik pawl an thlen veten sangka pawl khar thluh in ceekawknak an tuah. Khawngaw cu an um lo nan zung hnaṭuan pawl an thinphang zet” tiah amahcun a rel.

PTTEP company cu Thailand cozah ta si in, ralhraang ralkap hrang paisa hawlsaktu tiih puhmi an si ih, mipi ralkap pawl in ralrinpek nakah Yangon khuasung an zung rori ah bomb an puah hrim mi a si.

“An nih hi kan ram a buai hnu Kawlram suahsantu ziinan thawn pehparmi company hnen ah share tampi lei in, ralhraang ralkap hrangih paisa khur pakhat vekih ruahmi an si ih, curuangah an zung rori ah ralrin pekin bomb an puah” tiah tualsungum cun a rel bet hrih.

Sun nazi 12 hrawng khalah Kyauktadar le Pabedan myone ih um electric zung manager 2 pawl ih zung ah bomb a puak ih, bomb puahtu cu Yangon khuasung ih cangvaitu Toxic Boy pawlkom in an mah cangvaihnak a si thu, mipi an sim thei.

***Zuk Hlun

Leave a Reply

Your email address will not be published. Required fields are marked *