Yangon ih Martial Law an rak phuang nak san cu CNN in hitin a sim fiang

Yangon hmun ṭhenkhat ih Martial Law an rak phuang nak san cu ralkap thuṭhenzung hrangah Lamziin an rak sial cia mi a si….

Yangon ramṭhen hmun ṭhenkhat ih Martial Law an phuang nak san cu ralkap thuṭhenzung in thit daantat thuneihnak an nei thei nak ding hrang ih lamziin an sial cia mi a si tiah CNN cun a ngan.

SAC ralkap thuṭhenzung in Yangon mino 19 thih daan a tat thu cu ralkap neihmi MWD TV in April 9 zaan ah a phuang.

Cuih mino 19 pawl cu SAC in Martial Law a phuang nak N.Okkala ah Bokyi Htet Aung Kyaw an thawi that a si tiah ralkap lam in an puh ruangah ralkap thuṭhenzung in thih dan a tat mi a si tiah MWD TV in a phuang.

Hih thuthawn pehpar in CNN cun “ralbawi an that ruangah mino 19 cu ralkap thuṭhenzung in thih daan a tat hai tiah MWD TV in tlawngkai ninga zaan ah a phuang. Cumicu February 1 ih Myanmar rampi a buai hnu, ralkap lam in thih daan tat nak an nei hmaisabik mi a si.”

“Cuih mino 19 pawl cun March 27 ah North Okkalapa district ah ralbawi pakhat an thawi that tiah ralkap lam in an puh. Cumicu Martial Law an phuang nak North Okkalapa ih thil thleng si in an rel. Cuvek buainak, puhawknak a um tikah ralkap thuṭhenzung in thih daan tat thuneihnak nei thei dingin Martial Law an phuang mi hin lamziin a ong sak hai” tiah CNN cun a ngan.

Mino 19 lakih miṭhenkhat cu ralkap pawl in an kaingah zo ih a tang lai dang khal kaihkhih dingin an hawl rero tiah MWD TV cun April 9 zaan ah a phuang.

Leave a Reply

Your email address will not be published. Required fields are marked *