Air Base Ralbawi pakhat le a sungte cu PDF kut ah an ap aw

SAC ralhraang hrambunnak Naypyidaw, Air Base 45 ih ṭuanvonei ralbawi ZayThuAung (ဗိုလ်ကြီး) le a innsang cu Demawso PDF hnen ah an ap aw.

Amah hi ralkap hrang kum 17 lenglo hnaṭuanzotu a si ih, Pyin Oo Lwin ah training kai dingin a pok suak hnu, a sungte thawn Demawso PDF hnen ah ap aw in CDM a tuah mi a si.

“February 15 ah kan hnen ah a ap aw nan, humhimnak hrang ruatin tuini lawngah kan phuang mi a si. An sungten kan kut ah an ap aw ih CDM a tuah” tiah Demawso PDF ih ṭuanvonei mipakhat cun a rel.

Local DMO PDF khalin a hranten thu an suah ih “SAC ralhraang in rampi ukhruainak a la hnu, Air Base ihsin CDM tuahtu lakih rank sangbik a si. Kan nih mipi ralkap pawl in lungawiten kan hmuah ih a himnak hmun ah kan kuat zo”.

“Lungfim in mipilam kop duhtu ralkap hmuahhmuah hrangah sangka kaupi kan ong sak ringring” tiah an tarlang.

CDM tuah pawl record tuahtu pawlkom pawl ih tarlang mivek a si le rampumhuap in CDM tuahtu Ralkap le Palik 10000 luan an um zo ti a si.

Leave a Reply

Your email address will not be published. Required fields are marked *