US cozah in Kawlram mipi hrangah $50 Million bawmnak a pe

Leitlun ramtinkim ih pabik pakhat a simi US ram cun atufang kan ram boruak ruangih harsanak phunphun tuartu mipi hrangah $50 million bawmnak a pe tiah theih a si.

Cumicu U.S. Ambassador Linda Thomas Greenfield (UN palai) in Thailand ram a tlawng nakah a relsuakmi a si ih August 10 ah US cozah in official in an phuangsaalmi a si.

“Rampi buainak ruangih harsatuar ralkian pawl telin bawm tengteng ṭulmi Myanmar mipi hrangah US cozah in $50 million bawmnak a pe”.

“Himi bawmnak thawn kan ṭuanpi NGO le pawlkom dangdang in Myanmar mipi hrangah Sii le Vai, ei-in le umnak ding buuk tvk hrang tiang an tawlrel sak ding. Inn le Lo suah san in hramlak ih beutu ralkian pawl hrang khalah hman cih a si ding” tiah Linda Thomas Greenfield cun a rel.

US cozah bawmnak cu paisa fai thawn siloin Covid dokhamnak bungrua, ei-in, Ralkianbuuk saknak tivek hrang ah le harsazual pawl hrangah UN/US thawn hnaṭuantlang pawlkom dangdang in a ṭul dan vekin mipi bawmnak an pe vivo ding a si.

US cozah cun Kawlram hrangah $50 million bawmnak a pe hlei ah Thailand Covid 19 dokhamnak hrangah $5 million a hlu cih tiah theih a si.

Leave a Reply

Your email address will not be published. Required fields are marked *