Union Day ah Tlangpar Hriamkai pawlkom ṭhenkhat in an telpi cu MAH a hni siamsiam

February 12 ah Naypyidaw ih tuahmi voi 75nak Union Day nipi ah SAC ralhraang sawmnak cohlangin Hriamkai pawlkom ṭhenkhatin an telpi cu SAC ralhraang a lungawi zet.

Ralhraangbawi Min Aung Hlaing in thurelnak a nei ih “sawmnak ngai poimawhin kahdocolh hminkhen zotu siseh, hminkhen hrih lotu pawlkom pawl ih telpinak par ah kan lungawi ngaingai. A zalen mi rampi phungdaan thlun in remdaihnak hrang hmalaknak kan nei vivo ding” a ti.

SAC ralhraang Kepawkin Union Day ah Tlangpar hriamkai pawlkom 11 an tel ti a si ih cupawlcu a hmin men remdaihnak hrang SAC ralhraang thawn thureltlangnak an nei tiah theih a si.

SAC ralhraang tlonin Union Day ih telve kahdocolh hminkhenzotu Tlangpar hriamkai, pawlkom cu Karen National Union, KNU/KNLA – Peace Council, Democratic Karen Buddhist Association, New Mon State Party, Arakan Liberation Party, Lahu Democratic Union le Restoration Council of Shan State tipawl an si.

Union Day ih telve SAC ralhraang thawn kahdocolh hminkhennak nei hrih lotu cu United Wa State Army, National Democratic Alliance Army, Union League of Arakan (ULA/AA) le Shan State Progressive Party
tipawl an si.

Rampi cozah dinhmun in leitlunpi le pawlkom dangdang theihpitnak beiseizettu SAC ralhraang cu a uangaw zet ih, Union Day telpitu Tlangpar hriamkai pawlkom pawl thu le Union Day nipi hman dan tipawl cu mirangca rori thawn ngan terin online ah nasaten an theh darh. Kawl ca lawng ngan ṭheutu Ralhraang lamṭang media tivek tiang khalin cui mirangca cu online ah an theh darh ve nasa.

Leave a Reply

Your email address will not be published. Required fields are marked *