Tu Ni vek cekci, Kum 109 luan zo ah paralṭha Maung Thant thlai that a si

Mirang in kawlram a uk lai ih ramsung zalennak hrang sual thei tuding tiih ruahmi mipi pawl ih paralṭha Maung Thant cu tuni vek (June 21,1911) ah mirang pawl in a hngawng in an thlai that.

Lothlomi a siih Myinmu (tuih Sagaing Region) ih um a si. Mi tamzet in dawi thiam (supernatural power) ih ruahmi a siih ramsung harsatnak, tlaksiatnak lak ihsin zalennak hrang ih sual tuding, mipi hruaitu Paralṭha tiih ruahmi khal a si.

Mipi cun a lam kan ṭang, a hnen ih kan um ahcun cerek khalin in tei loding (a huham, a dawi in a kham thluh ding) tiih ruahnak neiin Myinmu police station an va do nan an va nehlo hlei ah Indian colonial police pawl in mi tamzet an rak kai.

Maung Thant cu hmun dang ah a tlan ih a relh nan Rangoon Central Railway Station ah palik pawl in an kai leh.

Mirang pawl cun Maung Thant le an kai ngah mi, mi 4 pawl cu Mandalay thawng-inn ah an awk that ih minung 29 pawl khal damsung thawngtlak dingin thuṭhensaknak an nei. A mah lam ṭangih mirang dotu, ṭanpitu pawl khal cawhkuan terin thawng an thlak thluh.

A thih hnu khalah kawlram khawte pawl ahcun “Myanmar siangpahrang thar” tiih mang/cing ringring mi a siih a mah hmin pu ih naute hmin phuah khal an tam zet. Irrawaddy ih piang, United Nations secretary-general rak ṭuan dahtu U Thant khal Paralṭha Maung Thant hmin pu ih hmin sakmi a si.

ref:Irrawaddy,Wiki

Leave a Reply

Your email address will not be published. Required fields are marked *