Thuthang puut darh ruangah ralhraang kut tuar in PDF ralkap 12 nunnak liam

Tuni, June 22 ah Magway ramṭhen, Pwintbyu peng, Pathein-Monywa ziinpi, MaeZali lilawn kiangah doawknak a suak ih ralhraang ralkap kut tuar in PDF ralkap 12 an thi tiah theih a si.

Zinglam nazi 6 hrawng ah PDF ralkap phurtu Keruk nei mawṭaw cu MaeZali lilawn kiangah ralhraang ralkap pawl in an rak kham ih cutin an kapaw thok tiah khawmi pawl in an sim.

Doawknak ah puakkuainak nasazet a suak ih a hmun rori ah PDF ralkap 12 an thi. Rapthlakza mithi ruak zuk le mawṭaw siatmi zuk cu ralhraang ralkap media ṭhenkhat in uangaw zetin Internet cahmai ah an pholang.

Palik pawl cathup kuatawmi dongvetu RFA tarlangdan ah Lilawn kiang ihsin mawṭaw rak khamtu hi ဗိုလ်မှူးမင်းပိုင်စိုး hohami ralhraang pawl an si ti a si ih, cakuat ahcun PDF ralkap 12 an thi ti`n siseh, nungdamin mi 3 an kai thu le cumi sungin hriam tuar besia 2 an tel thu, tarlang a si….

Doawk thu thawn pehparin Pwintbyu PDF ṭuanvonei KoKyarKyi in “Peng dang PDF ralkap thawn MaeZali lilawn ah kahawknak a um. Kan lam ah mithi an um ih kaih tuar tla an um. Ralhraang lam khalin an tuar ve.”

“Doawknak a suak hnu ah kan hnen ah bawmdilnak a um ih bawmmi khal kan nei. Atangmi midang pawl an him fel thu kan thei tikah thuhla felfai kan rel leh ding” tiah a ti.

Doawknak a suak thok dan hi a phunphun in an rel ih miṭhen cun ralhraang lam in RPG 5 thawn an kap cih tiah an sim.

Ṭhenkhat in le NUG pekmi ralthuam pawl an phur lai ah ralhraang ralkap pawl in an rak kham ih PDF lam in an kap hmasa tiah an rel ve.

Nan, Doawknak a um thu cu nemhnget a si zo ih PDF 12 an thi thu siseh, PDF kutsung ihsin KA 25 phun meithal 25, 40mm bomb kahnak 1 pawl cu palik in an lak ngah thu nemhnget a si ih meithal tamsawn cu puakkuai nakah a siat thluh ti a si.

Ralhraang ralkap in PDF ralkap pawl an rak bawh cia dan ah thu theih mi an nei cia ding zum a um ih, BBC khalin PDF ṭuanvonei mipakhat relmi sirhsanin “Thuthang puut darh ruangah ralhraang ralkap kut tuar in PDF 12 an thi” tiah a tarlang.

Pwintbyu PDF ṭuanvonei KoKyarKyi in “Thuthang a puut darh ruangah ralhraang ralkap in MaeZali lilawn ihsin an rak bawh cia.”

“PDF pawl to mi mawṭaw 2 an rak kham ih hmaisasawn mawṭaw ihsin mi 3 an ṭum lai ah dunglam mawṭaw ihsin an kap hmasa thok.”

“Kahawknak a suak ih mawṭaw par ih puakkuai thei ralthuam pawl an puak ruangah mithi an um. 12 an thi ih hriam tuar besia 3 an um. 2 cu nungdamin an kai” tiah BBC hnen ah a sim.

Doawknak ihsin tlansuaktu PDF ralkap ṭhenkhat an um ti`n ramsung media ṭhenkhat ah report a um a si.

Leave a Reply

Your email address will not be published. Required fields are marked *