Thawngtlak Tlan UDP party Chairman U Kyaw Myint thuhla ah Cozahpi in Zingzoinak nei

Kum 2020, Myanmar ram hrilawnak ah Chin ramkulh vote thlak hmunram tam zet ih zuam tu ding United Democratic Party (UDP) dintu, tufang ih Chairman U Kyaw Myint @Michael Kyaw Myint Hua (May Flower Kyaw Win) ih hlan lai thu thawn pehpar in Myanmar cozah in zingzoinak a nei tiah Myanmar President zung ih ṭuanvonei U Zaw Htay in September 29 ah a sim.

May Flower Kyaw Win ti khal ih koh mi UDP party dintu U Kyaw Myint ih thuanthu mawi lo, hlan lai thuhla pawl cu rinsantlak media Myanmar Now in tu thla, September thla lai hrawng ah a phorh suak thluh.

Cumi sung ih um vek a si le U Kyaw Myint in Myanmar rampi Daan a pahbal ruangah 1998 kum, January 1 ah pukma pahnih thawn Mandalay U-Bu thonginn ah kum 9 sung thawng thlak a si. Kum 1 rei hnu, 1999, January 19 ah Mandalay siizung ih thawng tlak dam lo pawl tuamhlawmnak hmun in Kawl palik bawi U Lu Maw timi pa thawn an tlan suak ti a si.

Thawnginn ihsin an tlan suak ruangah U-Bu thawnginn ih Palik bawi le a kut tang ih hnaṭuan palik 3 cu kum 9 ciar thawng an rak thlak.

Cuvekih thuanthu mawi lo neitu thawngtlak tlan si cing in Daan tat nak le kaih khih saal nak a um lo hlei ah, tu ah, rampi hrilawnak ih tel ve tu ding, Myanmar huap in vote thlak hmunram luah/zuam tambik pahnihnak, party tum zet dintu dinhmun in a cangvai saal tikah Myanmar ram mipi an mangbang thluh.

Cuvek dinhmun a si ruangah Myanmar now cun a thuhla zingzoinak a nei ih Myanmar mipi theisuak thluh dingin online ah a thlah.

Tu ah, Myanmar Now ih ngan mi U Kyaw Myint thuanthu cu rampi cozah nih zingzoinak a nei saal ih thuhla ciang a um tik le ziangtin hmalaknak an nei ding, rampi hrilawknak in an hnukdawk saal ding maw timi cu Cozah lam in thuthannak nei leh ding ah beisei phot hrih a si.

U Kyaw Myint hi amah bulpak in cu Kachin miphun ka si a ti aw nan Shan ramkulh ih um China nupa te ih hring mi fapa a si tiah Myanmar Now in a tarlang.

Leave a Reply

Your email address will not be published. Required fields are marked *