Tatmadaw thawn pehpar mi Facebook page thar 28 a um, Ramkhel nakah an hmang

Kum 2020 sungah Tatmadaw thawn pehpar mi Facebook page thar 28 a um ih cu pawl lak ihsin page 5 pawl cu viewer le follower nei tam dingin, paisa pek in thehlarnak an tuah cih tiah Myanmar Now cun a tarlang.

Viewer le Follower nei tam dingin paisa hmangin thehlarnak an tuah cih mi page 5 pawl cu ပြည်ထောင်စုတပ်မတော်, Tatmadaw Media Group, Myanmar Navy Sea Man, စစ်သီချင်း le ဖိုးစည် tipawl an si.

‘ဖိုးစည်’ timi Facebook page cun Kawl ralkap (Tatmadaw) thawn pehpar mi thuthang an thlah ṭheu tlun ah NLD dokalhnak ca tel mi, nikhat ah voi 3 tal an thlah ṭheu ih biaknak thawn pehpar mi thuthang diklo khal ramkhelnak ah hmangin an thlah ṭheu a si.

Tatmadaw aiawh vekih tuah mi Facebook page lakih 10 hrawng cun thuthang bangaw hlir an thlah ṭheu ih tuzarh sungih bangrep thuthang an thlah mi 20 a kim a si.

Cuih thuthang bangrep thlah ṭheu nakih an hman mi page pakhat cu The Leader tin hmin an pek. Cumi page cu U Thein Sein timi hmin thawn 2012 ih rak tuahmi a siih 2020 July 15 ah The Leader tin a hmin an thleng cawp mi a si. Page enkoltu Admin ah Russia ram ummi minung 2 an tel ih profile ah General Min Aung Hlaing zuk an hmang.

Tatmadaw aiawh Facebook page lakih follower neitambik cu Tatmadaw Media Group timi a siih a Follow tu 50k an luan.

Cumi page pawl ih thlah ṭheu mi ca tamsawn cu တပ်မတော်သတင်းမှန်ပြန်ကြားရေး le ချယ်ရီမြေ page ih post mi an copy sawng ṭheu mi a siih Tatmadaw zung offcial website khalah cumi thotho an post ṭheu a si.

Tatmadaw thawn pehpar mi thuthang thlah ṭheu nak Facebook page thar 28 thuthawn pehpar in Myanmar Now media in တပ်မတော်သတင်းမှန်ပြန် ကြားရေးအဖွဲ့ hnen ah official a si maw si lo, sut ciang tum in an contact nan tu ni tiang an biak thei hrih lo.

FB page ih an tar mi phone number pawl khalah an call nan တပ်မတော်နှင့် စစ်သတင်းများ timi page ih phone number lawng ah an biak aw ngah. Cukhalcu မွန်ပြည်နယ် ih ရဲဒုတပ်ကြပ် မျိုးမင်းလတ် timi in a rak kai ih an sim mi thuhla mukmak khal a theithaim lo. Cuhleiah cuvek FB page khal ka hmu dah lo, ka lut dah lo a ti.

Tuhlan khalah Tatmadaw thawn pehpar mi Facebook page tamzet a rak um dah nan Hnam, miphun huataw nakding thuthang an thlah ṭheu ruangah Facebook in, Page 480 le FB account 43 pawl cu 2018 kum ah a rak phit sak dah a si.

ref:MyanmarNow,Wiki

Leave a Reply

Your email address will not be published. Required fields are marked *