Tamu ih Miralṭha pawl in ralkap 13 an that

April 10 ih SAC ralkap le Tamu mipi doawknak ah SAC ralkap 13 an thi ih hliamhma tuar khal an tam zet tiah khuami hnen ihsin thuthang dongtu Mizzama in a ngan.

Sunlai nazi 12 hrawngah Sagaing ramṭhen, Tamu khua ih ralkham buuk pawl cu SAC ralkap le palik in nasaten an kap ciamco ih motorcycle to mipakhat cu SAC ralkap in an kap that.

Mipi lam in neihsun hriamhrei hmangin an do let leh ruangah SAC ralkap pawl cu dung an siip ih, culai ah mipakhat kut ken bomb dengmi cun SAC ralkap 13 a puah that hlei ah hliamhma tuar khal an tam zet tiah khuami pawl simnak thawng in theih a si.

Mipi lam khalah nunnak liam 2 an um tiah theih a siih mipi kilhimtu Tamu Security Group cun “Tamu dinhmun a ṭha lo. Sun nazi 12 ihsin kahawknak a thok ih tutiang khalah meithal puak awn theih ding a um. Mipi lam in mipahnih kan sung. Asinan mithitu hi Tamu Security Group ih telmi an si lo. SAC ralkap lam ah 3 hnak ih mal lo an thi ih in kap nak ah meithal tum an hmang” tiah an mai` FB ah an tarlang.

April thla thok in Ṭamu mipi le kawl ralkap pawl cu nitin deuh thaw an kapaw ih April 4 khalah nazi 6 sung hrawng an kapaw.

Cuih ni ah mipi lam in ralkap motor sungah kutken bomb an deng puak ih ralkap 4 an thi. Mipi lam khalah hliamhma tuar an um tiah thufelfai theih a si ih mithi an um le umlo cu theihcian a si lo.

Tamu hi ralkap le palik in an tin cuangnak cu April 2 zaan ih kut ken bomb thawn palik zung an deng puak ruangah a si tiah khuasung dinhmun cuantu pawl in an sim.

Cuih zaan ah CDM luttu Chin paralṭha palik pakhat in kut den bomb 3 keng in miburkhat a hoha ih palik zung an siim nakah mi 5 an that. Palik zung do nakih hohatu Chinpa khal cu palik zung kiangte ah an kap that tiah theih a si.

Edit : Zaan thimhnu khalah SAC ralkap pawl an cangvai ih Tamu khuasung laili ih um innpi pakhat an urkaang.

Leave a Reply

Your email address will not be published. Required fields are marked *