Tamu ih an kapaw nasatuk cu Mipi lam ṭhiṭha khalin Rawl an ei man lo

Tuizing, April 12 ih Tamu doawknak ah mipi ṭhenkhat cu hmunhim beunak hawl in biakinn sungah an relh tiah theih a si.

Kan dung nihnih sungah SAC ralkap thawn doawknak ah mipi lam in ralkap 15 luan an that ih cumi phuba la tumin SAC ralkap pawl cun April 12 zing ah thazaang tampi thawn Tamu khua an siim sal tiah khuami pawl in an rel.

“Zinglam nazi 6 hrawngin SAC ralkap in meithal an kap puak thok. Nauhak telin kan nih cakvaklo le nunau ṭhenkhat cu biakinn ah kan relh. Rawl khal hih hmun ah kan ei. Meithal a puak nasatuk ih rawl khal ṭhiṭha in kan ei man lo” tiah Tamu khuami mipakhat in a sim.

Tamu hi SAC ralkap in an bat cuangnak cu April 2 zaan ih kut ken bomb thawn palik 5 an deng puak that ruangah a si ti`n khuasung dinhmun cuantu pawl in an sim.

April 4 khalah nazi 6 sung hrawng an kapaw ih cuih ni khalah ralkap motor ih an deng lut mi kut ken bomb in ralkap 4 a puah that. Mizaan le tihnisun lam khalah mipi lam in SAC ralkap 15 hnak ih mal lo an that.

SAC ralkap in mipi lam an cetcangdan an hupphurh deuh ruangah April 12 zing ahcun thazaang tam deuh thawn Tamu khua an siim sal.

Siizung le biakinn ṭhenkhat sung tiang an luthnawh ih Laimi umnak Sandaku veng cu nasa zetin an kap tiah Tamu hrambun media ṭhenkhat in an tarlang.

Tuhrihtiang ahcun kum 7 nauhak pakhat a nunnak a liam tiah theih a si ih hliamhma tuar le kaihkhih tuar an um le umlo cu thufelfai a suak hrih lo.

Leave a Reply

Your email address will not be published. Required fields are marked *