Tachileik bomb puahtu ti`n Mino pakhat Kai Hrem`

Tachileik : February 1 ih ralhraang dinpit lamzawhnak an nei lai ih bomb puak thu thawn pehparin kaihkhih tuar 10 hnak ih mallo an um ih cupawl lakah bombpuahtu tiih puh tuar WA mino pakhat cu ralhraang ralkap in nasaten an hrem.

Kum 24mi WA mino cu Tachileik, Weinkyauk vengmi a si ih lamzawh bombpuaknak a suak hnu, zaan nazi 8 hrawngih kiangkap CCTV zohin kaihkhih a tuar tiah theih a si.

“Ralhraang in mi inn CCTV zohin an kai mi a si. Na phuang hlan lo ti`n mizaan ihsin tuini tiang nasaten an hrem” tiah sunglamthu theitu mipakhat cun TNA hnen ah a sim.

February 1 ih ralhraang dinpit lamzawhnak cu SAC Ralhraang, an lam áš­ang le USDP party hohanak thawn an tuah tiah thuthang a suak ih, January 31 khalah lamzawhnak an nei zo.

Silent Strike cangvaihnak khuhhlo tumin February 1 ih lamzawhnak an nei pehzom lai ah rinlopin bomb a puak ih puakkuainak ruangah le thinphangin ralhraang ralkap pawl in meithal an kap ciamco ruangah mithi 2 le hriam tuar 30 luan an um.

Cupawl lakah besia deuh 6 an um ih, mipakhat cu tuini February 2 ah a thi bet ruangah puakkuainak le ralhraang meithal kappuak ruangah Tachileik khawsung ralhraang dinpit lamzawh bombpuak ah mithi 3 le hriam tuar 30 luan an um a si.

Tachileik khawsung bomb puak hi zoi` cangvaihnak a si ti theih a si lo.

Leave a Reply

Your email address will not be published. Required fields are marked *