Sushant thih Thuhla ah A Rual Ṭha Myanmar Nu in thusimnak nei

Tulai Bollywood le Asia zuknung khawvel ih rel tambik cu Sushant Singh Rajput thihnakthu a siih mitawk, fel, thiam, hmelṭha, mi nunnem a si zia, zuknung khawvel ih a rualpi le a sungkhat unau pawl in an rel cio ih, a rualpi ṭha a si ve mi Kawl ram mi Laila Khan khalin Sushant thuhla simnak a nei ve.

Laila Khan cun ” A hmin cu Sushant a siih kum 34 a si. Tuhlan kum 10 ah kan rualpi zaten a ra laiding ticucaan ih nuntukhawsak danding hawl in kan um ih a nih cu India TV khawvel ah a lut.

Kawlram ah TV le Cinema khawvel a um vekin India khalah phun 2 in a um ve ih a nih cu TV khawvel ah a hlawhtling zet. Kan rualpi rual lakah fala a nei ih leng suakvak khalle kan thlun awhai ringring ruangah Sushant Singh Rajput thawn kan nelaw zet.

A thih thuhla hi ka pehzom thei lo. Ka mang a bang. Asancu a nih hi ruahnak kau (positive mind) zet nei a siih nel khal a awl zet. Ziangvek tikcu caan khalah lungawi hnisiamsi ten um ringring mi a si.

Amahten a thataw timi thuthang hin thil tampi i ruatter. Harsatnak, thin harnak kan tong hman ah mi hnem sawntu ringring a siih mah le mah that awding khawp in ziang buainak saw a nei ke tihi ka ruat theilo lawlaw.

Tu khalah Cinema video zukmi 3 a nei. Lam khal a thiam ih cangan lam khalah sawiselding um lo khawp ih thiam a si. Talent a neih zia cu zuknung a cang mi ah kan hmu thei.

Sumsaw lam khalah tlasamnak a nei lo. Covid – 19 hlan ih India, Kerela tilik lai khalah harsa tuar pawl bawmnak dingin Rs 2 crore ($ 2,62,070.00) rori a hlu.

Hiti vekih hlawhtlinnak nei mipakhat cun ziang ruangah a mah ten a thataw timi hi theithiam thei rual a si lo.

Ziangtiklai khalah a fala nu a ngaihsak. A duat thiam. Tu hlan ih kan um dan tete mitthlam ah a cuang sal tikah reh asia ngaingai.

TV khawvel ah a hlawhtling ih kan nih khal kan tuahmi par ah kan hlawhtling ih VIP dinhmun in Cricket lek nakah kan feh tlang ṭheu. Kan tonak ciar ihsin kan zohawk hai ih hih dinhmun thleng dingih kan rak talbuai zia kha mit thlam ah cuang in hni siamsi ten kan zohaw lai tivek ka vun ruat tikah ka ninghang.

An pahnih karlak ih pehzomawnak thuhla ah “Kan biakaw tuk lemlo. Asancu kum 2013 hrawng ah Bollywood ihsin cawlh ka lak ih mah ṭul poimawhnak thawn kawlram ah ka tlung sal. India ram ah rualpi tongawkhawmnak kan nei caan ah a nih cu video zuk dingin khua dangah a um ṭheu ruangah kan hmuaw thei tuk lemlo. Hlawhtlinnak nei cio kan si vekin ṭhenkhat cu Tamil Video khawvel ah hmin nei an rak si zo tikah rualpi kim ten kan tongaw theilo.

Kan tongaw caan ah Sushant teh khawilam ramah a thleng pei kan ti ṭheu ih kan rualpi pakhat cun thinhar khawruahhar nakin a tlak ih siikhan, sizung khalah a tuamhlawmaw ṭheu inti tikah kan mangbang ih ziangti thu lamlam in a nih rori hivek in a um thiam tiin ka mang a bang.

Kan rualpi zaten veh in, a thinharnak pawl hnem tumin kan hawl nan a hlan ih a umnak hmun ihsin a ṭhawnaw ruangah a umnak thei loin kan leng suak theilo.

Phone in kan call nan a phone a switchoff ruangah kan biak thei loih a manager hnen ah a rualpi kan si in sim sakaw tiih message kan kuat khalle zianghman reply nak a um lo.

Tuah, Sushant thih hlan ni 5 hrawng ah a manager pa cu inn par ihsin a dawp that. Cuhnu ni 4-5 hrawngah Sushant a thlai thataw lala. Kan thin har, kan mangbang.

A thih hlan, media pawl hman ih thei hlan ihsin kan thei zo ih kan rualpi zaten kan phone aw ih taktak teh si pei maw? malte vun hngak hrih sehla kan tiaw ih minute 10-15 hrawng rei hnu ah media pawl in a thuhla an suah ih a thi a si ti kan thei ciangcun kan ṭap. Kan rehsia.

Cule thinharnak ruangah thla 6 sii le vai a ei nan a ei lonak thla 2 hrawng a rei zo tin kan thei. A thihnak thuhla ka vun pehzom tum cu ka theithiam theilo lawlaw. Ka riahsia ka ninghang rori.

Cun ka pamhmai tuk. Artist dinhmun khalah a tawk. Rualpi sinak khalin ka ui tuk. Cawntlak nun khal a nei. Entertainment khawvel khalah ziangkim a thiam thluh. Film sungih sualawk tivek khal ah midang vekin cangvaithiam pawl a hmang ve dahlo. A mah rori in a sual. A taksa khal a mawi. Cei ciamco khal a ṭullo. Zuamnak, Teimaknak thinlung khal a nei. Lehpannak lam khalah a thiamkim. Guiter khal a tum thaim.

A ṭong ṭheumi pakhat cu kum 30 ah nupi ka nei ding a tiih tuah kum 34 a kim zo. Nan, nupi hman nei hrih loin a um ih tu ahcun a thi zo. Kan rualpi zaten kan tuar tuk rori a si” tiin Laila Khan cun a sim.

Sushant Singh Rajput (kum 34) cu India TV le Bollywood khawvel ih lem cangthiam hminthang a siih 14 June 2020 ah a umnak Bandra West, Mumbai ah a hngawng in a thlai awthat a si.

(PJ)

Leave a Reply

Your email address will not be published. Required fields are marked *

error: hahahahahaha !!