Sunpadir khalah Ning ṭih ding khawp ih Ṭhing riapriap Kalaymyo

2021, March 30 ahcun Kalaymyo cu ṭhing riapri rocar zetin a um. Nikhua sia, thlipi huuk tum vek, lamziin ah vak sukso hmuh ding khal an um lo. Suah lo theihlo ṭul poimawh lo bak ah lengsuak an um lo.

Culaiah St. Mary biakinn sir ih um suakthuan tlawng kulh sungah ralkap motor an ding ṭhepṭhep.

Tahan tiih koh mi Chinmi tamsawn umnak veng le Kalaymyo pehawnak Tada-U, SanPiah ziin ziik khalah ralkap tamzet an um. Bogyoke ziintluan ih um mi thingkung tamzet dunglam/phen khalah ralkap pawl an relh thup.

Thli hrang ah thinghnah an ṭil mi le thingṭek ro baak lo cu mivak sukso khal hmuh ding an um lo ih danglam zetin a dai khepkhep. Awn-ai thawmvang um lo tuk cu thil maksak pakhatkhat thleng suak ding vek khi a bang tiah Kalaymyo ih mipakhat cun a hminsin.

March 28 le 29 ni ah mipi le ralkap nasa zetin an kapaw ruangah khuasung cu tuvekin a dai khepkhep nak san a si.

Kalaymyo mipi ih hmanbikmi Bogyoke lamziinpi le Bayinnaung lamziinpi kiangkap ih um mi ṭhenkhat cu inn ah um ngam loin hmun dang ah an ṭhawn thluh. Miṭhen cu Kalaymyo sungih hmunhim kerkawm lam ah an ṭhawn. Ṭhenkhat an si le khua lam ih tlung khal an um. Asinan, khuate lam khal a him zet cuang lo ih boruak khal a ṭha hran cuang lo. Kalaymyo thawn hlat tuk lonak Sitha khua kiang ah tla cun mipi le ralkap nasa zetin an kapaw.

Kalaymyo, Bogyoke lamziinpi le Bayinnaung ziinpi kap ih um inn pawl ih bun mi CCTV pawl cu ralkap pawl in kuahli thawn sai na, meithal thawn kap na ti`n an siatsuah. Inn ṭhenkhat ih thlalang cu a kuai thluh ih innphar tlakrawh par ih cerek neh hmuh ding khal a tam zet. Ralkap ṭhenkhat cu mi inn ah lut in an CCTV an phit ter.

“Meithal tin phah in kan inn ah ralkap pawl an ra lut. Ka tu nu in ṭih tukin a ṭap ciamco cu ralbawi pakhat in ‘ṭih hlah aw. Zianghman hman kan lo ti lo ding. CCTV kha in phit sak uh’ a ti. Tawk deuh lai. Ralbawi ṭha ka tong cu ka van ṭha. Hmun dang ahcun hivek an si lo” tiah ziinpi kap ih inn neitu Daw Aye Aye in a ti.

Ralkap cangvaihnak hmuh ding a um ruri ruangah le kapawknak a um ruangah inn ṭhawn tu an tam ih lamziinpi khal a ṭhing riapriap.

“An nih pawl cu an lung lutlo cun lamziin ih an hmu mi pohpoh an kap thluh. Suakvak lo theihlo, lengsuak ṭul rori lawngah innleng kan suak. Culocu kan suak ngam lo” tiah Ko MaungGyi in a ti.

Bogyoke lamziinpi le Bayinnaung ziinpi ih dawr hmuahhmuah cu an phit thluh. Kalaymyo ih bazar pibik pahnih khal an phit. Zuar tuding khal an um lo ih lei tuding khal an um lo. Zuartu an um lo ruangah leitu an um lo, leitu an um lo ruangah zuartu khal an um lo. Cuvek dinhmun cu a si.

Ko MaungGyi cun “Thlanmual ṭhing bangin a rorum. Mikip an riahsia. Kan thinlung ah himlonak timi a khat. Patrol lei duh khal le leinakding hmun/dawr a um nawn lo.” a ti.

Bayinnaung ziin ih um Daw SanSan cun Minung vaksukso um loin Lampi a ṭhing tukcu riah lamlam a sia. Suunpadir rori ah ning ṭih ding khawp ih a ṭhing mi khuapi vek a si a ti.

Bank pawl an phit thluh ih zohman in bank ta paisa an suah thei lo. Yangon ahcun ATM ihsin paisa suah a theih lai nan Kalaymyo ahcun ATM cet khalin paisa a suah nawn lo.

“Mizaan ah thil ṭul poimawh a um ruangah leng ka suak. Lamziin tamzet ka thleng. Main road khal siseh ziinte khal ka hroh thluh. Feh duhlo khalle feh lo a theih lo. Ziin phit nak khal a um ih thilri peng khawm ih kham mi ziin khal a um. Mei urkang nak hmun khal a um. Ralkap motor ka hmu le ka hrial hai. An nih pawl hin thil tuahdan phung an nei. Motor cawl in an ṭum veten a hrekhrek in ziinkam khatlam veve ah an ṭhek aw. Cun, a feh nak piang ah an lung lut lo mi hmuahhmuah cu an kap thluh. Curuangah hrial thei tawkin hrial hrim an ṭul. Ziin kerkawm ka zawh ruangah lamziin ah nazi 1 hrawng ka rei. Cumi sungah mi 10 hman hmuh ding an um lo. Motor pakhat cu ka hmu” tiah Ko MaungGyi in a ti.

Vengbawi siseh Khuabawi pawl khal siseh khuasung faang hmunram haal in zohman an vak thei nawn lo. Veng ṭhenkhat ahcun hlan ih an veng lal pawl thawn mipi an lung tongaw ruangah tuhlan ih an hman mi thotho ukhruaitu ah an hril. “Vengmi pawl thawn remrual aw mi vengbawi an si nan ralkap cozah pawl ih hnaṭuan pekmi an si ruangah mipi lam in hruaitu dik ah an pom duh lo. Curuangah ukhruaiawk daan khal a hlan vekin a feh thei lo.

Kalaymyo ihsin khua dang ih tlan passenger phur motor cu an um nan an mal tuk tiah khuami pawl in an sim.

Asinan, tuhlan ai ih tam in, vak suk sotu motor dang an um. Cupawlcu Ke 12 nei motor pawl an si. Kalaymyo kiangkap ih Thing hau an rak kham dah nak ih Thing pawl cu duhsah in an hau ih licence nei bangin zaanvar an phur, an thiar.

Ahlan khalah Thing pawl cu an fir ṭheu ko. Nan, Meihol phur mi tang tivek ah mal tak teten a thup thiar in an phur ṭheu. Nan, tuahcun ralkap le palik khal ṭih loin langhnganpa rorin zalen zetin Thing an phur hluahhlo tiah Kalaymyo ih um pawl in an sim. (BBC)

Leave a Reply

Your email address will not be published. Required fields are marked *