SL thuthang neitu Dalan le a nupi an kap that

Mipi ralkap pawl ngiar ṭheutu SL News Agency neitu Sein Lin le a nupi cu tuni July 11 ah mipi ralkap pawl in an kap that tiah theih a si.

An mah hi Kalaymyo, Aung Mingalar veng ih um lawk an si ih kan ram a buai pek ah Dalan a si ti an thei ruangah an innsang zaten veng sung um pawl in an dawi suak.

Umnak neiloin Thahpanaing khawte ah an um lawk ih ralhraang ralkap in an umnak hmun ah umnak thar an pe hnu, SL News Agency timi online thuthang din in mipi ralkap a ngiar ṭheu.

A thok ah SH thuthang timi a rak tuah dah ih Dalan a si ti an thei ruangah veng sung ihsin an dawi suak. Ralhraang ralkap in umnak hmun an pe ih, kum 2022 April thla ah SL News Agency timi online thuthang cahmai pakhat a din saal.

“Cumi thuthang pawl ah PDF ralhraang an kai tivek le PDF ralhraang thawn pehpartu an kai tivekin ralhraang ralkap thuthang a suah ringring. Cuhleiah FB ah live thlah in “Ralkap ka ṭan ruangah in that duh si le cu in ra that uh, Nan Pu nan Pa PDF pawl kha ziang ah ka siar lo” ti`n mipi ralkap pawl a ngiar ṭheu” tiah tualsungum mipakhat in a rel.

Mipi ralkap in amah thawn hnaṭuantlang Dalan 2 an rak that dah zo ih cupawl an thih nak san cu thluak an nei lo ruangah a si a ti. Ka umnak cu cunah khanah a si. PFD ralhraang pawl nan ngam le in ra that uh ti`n a ngiar hai ṭheu tiah amahcun a rel bet hrih.

Cuvekin mipi ralkap a ngiar ṭheu ruangah le Dalan ṭuanin amah ruangah kaihkhihmi an um hnihthum zo ruangah Khawsung ih cangvaitu mipi ralkap pawl in tuni July 11 ah a nupi thawn Lakphak an in lai ah meithal thawn an kap that tiah thuthang kan thei.

Leave a Reply

Your email address will not be published. Required fields are marked *