Serh bangaw (LGBT) pianvo peksuak dingin NLD party in Tiamkam

NLD party cun November, rampi hrilawknak ah nehnak a co a si le Myanmar ramsung ih Serh bangaw cakhairnak lungput nei pawl nuntukhawsak nakah thleidannak um nawn lo dingin hmalaknak a nei tum.

Myanmar ram san thuahthu ah LGBT dinpitu party hmaisabik khal an siih mimal pianvo peksuahding tumtahnak an nei mi ah LGBT khal telh cih in hmalaknak an nei tum mi a si.

Hih thu ah NLD ṭuanvonei Dr Myo Nyunt cun, “Serh bangaw cakhiarnak lungput cu milai pian pi mi a si. Asinan khawtlang ih an tlanlendan a dang deuh ruangah hmuhsuam palbet hnihsuahsainak vekah hman ṭheu a si ruangah, hivek thleidannak um nawn lo dingin hmalaknak kan nei tum mi a si. Party policy thupi ih telh mi a siih hrilawnak ah nehnak kan co a si le kan tiamkam vekin kan tuah ngaingai ding” a ti.

LGBT hi Kawl nunphung thawn a kalh aw mi a si ruangah le khawtlang mipi ih thleidan lungput ruangah Tuai tamsawn cu an sinak dik suahpi ngam lo in an um. Curuangah Myanmar ramsung ah Tuai ziangzet an um timi theihcian a si lo ih, cozah ih kum 4 sung survey tuahmi vek a si le pa le pa cakhiarnak lungput neitu mipa Ting hnih le hrek hrawng an um ti a si.

1861 kum ih suah mi Myanmar Penal Code 377 ah “pa le pa, nu le nu lole rannung thawn nupa sinak hmangtu cu kum 10 lole damsung thawngthlak ding” tin a um. Cuih penal code 377 cu remṭhatsal dingin Myanmar LGBT pawlkom ṭhenkhat le LGBT dinpitu NGO ṭhenkhat in nasaten an buai pi ih a tu cozah thar din tuding hnen khal ah remṭhatsal dingin nawr an tum tiah CTNT media cun a tarlang.

Leave a Reply

Your email address will not be published. Required fields are marked *