SAC ralhraang thusuah cun KhuaBawi le VengLal pawl a ti laklawh thluh

December 10 ah dawr pawl phit thluhin rampumhuap Silent Strike neih a si ruangah khuapi ziinpi pawl cu a ruak thluh.

Dothleng cangvaihnak pakhat dinhmun ih hmanmi a si tikah SAC ralhraang pawl cun a ni thlenhlan ihsin dawnkham danding an tawlrel nasa.

December 9 zaan ah rampumhuap khua tamzet ah mawṭaw thawn an vakkual ih Dawr pawl ong thluh thotho dingin nasaten tlangthannak an nei.

Cuticingin, rampumhuap mipi cu leitlun hminthang media picang pawl ih ngaihsak hlawh khawp tiangin Silent Strike cangvaihnak ah an telih, kan ram mawṭaw ziinpi le bazaar pawl cu a ruak thluh.

“Silent Strike” nipi ah kan ram dinhmun ciang zetin langfiang

Cumicun kawlram mipi lungrualnak a langter rualrualin ramuktu tiih ruatawtu ralhraang hrangah mualphonak tumzet a si.

Mipi an uk thei lomi ningzahnak cu mipi par ah an ti lang ih, khua ṭhenkhat ah zarhkhatsung dawr pawl phitter thluh lawlaw dingin thu an suah.

Cumi thusuah tlangthan ding cu Khawuktu le Veng Lal pawl ih ṭuanvo a si ih, thusuah vek ciah ih phuang dingin le ralhraang hnaṭuantu tiih hringhrotuding PDF an rak um, phuang lo dingin le SAC ralhraang an ṭih tikah dinhmun laklawh zetah an um.

Innleng suaklo dingin ralhraang pawl in mipi hringhro, Meithal hmet puak

Cuvek a si ruangah Bago ramṭhen, Daik-U khuauktu pawl cun Covid 19 phuahlam ah hmangin ni 5 sung dawr phit dingin tlangthannak an nei tiah theih a si.

Hih thuthawn pehparin tualsungum mipakhat cun “Ni 5 men ah Covid 19 boruak a deem thei lo. An bawi pawl thusuah le an el ngam lo. PDF/Mipi le an ṭih lala fawn, laklawh zetin an um ih, aremcang bikding ti`n Covid 19 pianhmangthleng Omicron an puh mei.”

“Zamrang zetih a karh theimi Covid 19 pianhmangthleng Omicron kan ralring theinak dingah 11/12/2021 ihsin 15/12/2021 tiang Myoma bazaar kan phit ti`n thu an suah” a ti.

Leave a Reply

Your email address will not be published. Required fields are marked *